काठमाडौं- शाहरूख खान, दीपिका पादुकोण र जोन अब्राहम अभिनित फिल्म 'पठान' ले विश्वभर नै राम्रो कमाइ गरिरहेको छ। नेपालमा पनि पठानको कमाइ राम्रो भएको छ।
नेपालमा मनोज राठीले पठान ल्याएका हुन्। फिल्मले १ सातामा नेपालबाट ६ करोड रूपैयाँ कमाएको छ। २५ जनवरीमा रिलिज भएको पठानले अझै राम्रो संख्यामा दर्शक पाइरहेको छ। पठानले नेपाली फिल्मसँग प्रतिस्पर्धा नै गर्नु परेन। भोलि शुक्रबारदेखि बल्ल जितु नेपालको ह्यारीकी प्यारी रिलिज हुँदैछ। हलहरुले नेपाली फिल्मलाई राम्रै संख्यामा शो दिए पनि पठानले पनि पर्याप्त शो पाइरहेको छ।
जितु नेपाल र साम्राज्ञी राज्यलक्ष्मी शाहको मुख्य भूमिका रहेको ह्यारीकी प्यारीले पहिलो दिन शुक्रबार क्यूएफएक्सले २५ शो उपलब्ध गराएको छ। त्यस्तै बिग मुभिजले ३, बिएसआरले २, वान सिनेमाजले ६, एफक्यूबले ३ शो उपलब्ध गराएका छन्।
डा. भोला रिजालको निर्माण एवं उनका छोरा डा. कपिल रिजालको लेखन एवं निर्देशन रहेको चलचित्रमा विजय बराल, लक्ष्मी गिरी, सुवास गजुरेललगायतको पनि भूमिका छ।
प्रिमियरमा निम्तालु चलचित्रकर्मीबाट निकै राम्रो प्रतिक्रिया पाएको ‘ह्यारी कि प्यारी’लाई दर्शकहरुले पनि रुचाउने विश्वास गरिएको छ। भोला रिजाल दुई दशकपछि यसै चलचित्रमार्फत निर्माताका रुपमा फर्किएका हुन् भने जितु पहिलो पटक सोलो अभिनेताको रुपमा प्रस्तुत भएका हुन्।