सन्दीप लामिछानेको निलम्बन फुकुवा

काठमाडौं- नेपाल क्रिकेट संघ (क्यान) ले बलात्कार आरोपी क्रिकेटर सन्दीप लामिछानेमाथिको निलम्बन फुकुवा गरेको छ। पोखरामा मंगलबार बसेको बोर्ड बैठकले उनीमाथिको प्रतिबन्ध फुकुवाको निर्णय गरेको हो।

नेपाली राष्ट्रिय क्रिकेट टिमका पूर्वकप्तान लामिछानेले गत भदौ ५ गते काठमाडौं गौशालाको एक होटलमा लगेर नाबालिग किशोरी बलात्कार गरेको आरोप लागेपछि क्यानले उनलाई भदौ २३ मा निलम्बन गरेको थियो। गत असोज २० गते पक्राउ परेका लामिछाने पुर्पक्षका लागि थुनामा रहेकोमा पाटन उच्च अदालतले गत पुस २८ गते २० लाख धरौटी राखेर छोड्न आदेश दिएपछि थुनामुक्त भएका थिए।

उनलाई धरौटीमा छाड्ने आदेशविरुद्ध महान्यायाधिवक्ता कार्यालयले मंगलबार नै सर्वोच्च अदालतमा निवेदन दर्ता गराएको थियो। सोही दिन क्यानले भने लामिछानेमाथिको निलम्बन फुकुवाको निर्णय गरेको हो।

निलम्बन फुकुवाको बारेमा क्यानले औपचारिक रुपमा सूचना भने दिएको छैन। निलम्बन फुकुवापछि उनलाई राष्ट्रिय टिममा समावेश गर्ने-नगर्ने वा नेपालको तर्फबाट खेल्न अनुमति हुने-नहुनेबारे पनि स्पष्ट भइसकेको छैन।