मागियो क्यान अध्यक्षको राजीनामा

काठमाडौं– नेपाल क्रिकेट संघ (क्यान) मा आबद्ध ७ असन्तुष्ट केन्द्रीय सदस्यले कार्यसम्पादन समितिमा रहेका पदाधिकारीको राजीनामा मागेका छन्।

आइतबार क्यानका केन्द्रीय सदस्यले पत्रकार सम्मेलनमार्फत अध्यक्ष चतुरबहादुर चन्दसहित कार्यसम्पादन समितिका प्रशान्तविक्रम मल्ल, रोशन सिंह, दुर्गाराज पाठक र पदक खड्काको राजीनामा मागेका हुन्।

नेपाल टी–२० लिगमा देखिएको पछिल्लो विवादमा कार्यसम्पादन समितिको कमजोरी भएको दाबीसहित उनीहरुले अध्यक्षको राजीनामा मागेका हुन्।

पत्रकार सम्मेलनमा क्यानका केन्द्रीय सदस्य अमितवीर पाण्डे, छुम्बी लामा, धर्मराज गिरी, ऋषिराम गौतम, दाउद अन्सारी, सञ्जयराज सिंह, करण महतरा क्षेत्री उपस्थित थिए। उनीहरुले नेपाल टी–२० लिगको स्पट फिक्सिङ र भारतीय कम्पनी सेभेन थ्री स्पोर्ट्स कम्पनीसँगको सम्झौतामा क्यान नेतृत्व दोषी रहेको आरोप लगाए।