गृहमन्त्री रवि लामिछानेको नागरिकता विवादबारेको फैसला आउँदै

काठमाडौं– राष्ट्रिय स्वतन्त्र पार्टीका अध्यक्ष तथा उपप्रधान एवं गृहमन्त्री रवि लामिछानेको नागरिकता र प्रतिनिधिसभा सदस्यको वैधतामाथि दायर मुद्दामाथिको बहसबारे फैसला आजै आउने सम्भावना रहेको छ। 

सर्वोच्च अदालका कामु प्रधानन्यायाधीश हरिकृष्ण कार्की, न्यायाधीश विश्वम्भरप्रसाद श्रेष्ठ, ईश्वरप्रसाद खतिवडा, डा आनन्दमोहन भट्टराई, अनिलकुमार सिन्हाको संवैधानिक इजलासमा दुवैतर्फका कानुन व्यवसायीको बहस सम्पन्न भएकाले आजै फैसला हुने सम्भावना देखिएको हो। 

मुद्दामा जोडिएका न्यायाधीशहरु बहस सकिएसँगै फैसलाको तयारीमा जुटेका छन्। लामिछानेको सांसद सदस्य खारेजी माग गर्दै अधिवक्ता रविराज बसौला र युवराज पौडेल छुट्टाछुट्टै रिट दायर गरेका थिए। 

अमेरिकाको नागरिकता त्यागेर पुनः नेपाली नागरिकता नलिई खारेज भएकै नागरिकताबाट प्रतिनिधिसभा सदस्यको उम्मेदवार बनेकाले उनको सांसद पद खारेजीसहितको माग गर्दै २८ मंसिरमा लामिछानेविरुद्ध सर्वोच्चमहा रिट दायर भएको थियो।