विश्व भेट्रान्स टेबल टेनिस च्याम्पियनलाई राखेपको स्वागत

काठमाडौं- ओमानको मस्कटमा जारी २०औं विश्व भेट्रान्स टेबल टेनिस च्याम्पियनसिप २०२३ मा विजयी खेलाडीद्वय राजेन्द्र दुलाल र रक्त मानन्धरलाई आज राष्ट्रिय खेलकुद परिषद्मा सदस्य सचिव टंकलाल घिसिङले स्वागत गर्दै बधाई दिएका छन्। सदस्य सचिव घिसिङले खेलाडीहरुलाई बधाई दिंदै आगामी दिनमा पनि यस्तै उपलब्धी हासिल गर्न शुभकामना प्रदान गरे।

दुलाल र मानन्धरको जोडीले पुरुष डबल्स ४५ वर्ष माथीको समूहमा भारतीय खेलाडी रजनिश खतवकर र अमृत अनिल मोदीको जोडीलाई फाईनलमा पराजित गर्दै स्वर्ण हासिल गरेका थिए।

यो टेबल टेनिसमा ऐतिहासिक सफलता रहेको दुलालले जानकारी गराए। च्याम्पियनसिपमा दुलाल र मानन्धरका अलावा संजय अर्याल, प्रकास बहादुर धाख्वा, निम जोशी र प्रशिक्षकमा अनिता महर्जनको समेत सहभागिता रहेको थियो।

नेपाली खेलाडीहरुको हौसला अभिवृद्धि गर्नका लागि ओमानस्थित नेपाली राजदुत डोरनाथ अर्याल र त्यहास्थित नेपालीहरुको उल्लेख्य उपस्थिती रहेको थियो।