फिल्मको टिमले धरानका मेयरलाई दियो रुद्राक्षका बिरुवा

काठमाडौं- कलाकार साम्राज्ञी शाहले धरानका नगर प्रमुख हर्क साम्पाङलाई एक सयवटा रुद्राक्षको बिरुवा हस्तान्तरण गरेकी छन्। आफू अभिनित पछिल्लो फिल्म ‘ह्यारीकी प्यारी’को प्रमोसनका लागि त्यहाँ पुगेकी उनले साम्पाङको वृक्षरोपण अभियानमा साथ दिएकी हुन्।

बिरुवा हस्तान्तरण क्रममा अभिनेता जितु नेपाल र निर्देशक कपिल रिजाल पनि उपस्थित थिए। साम्राज्ञीबाट बिरुवा ग्रहण गर्दै मेयर साम्पाङले ती सबै बिरुवा रोपेको र त्यसको नाम ‘श्रम संस्कृति पार्क-कलाकार क्षेत्र’ राखिने बताए। फिल्म निर्देशक रिजालले धरानसँग आफ्नो साइनो जोडिएको बताए। आफ्ना बुवा डा. भोला रिजाल पनि धरानमै जन्मिएको र आफू पनि हुर्किएको उनले सम्झिए। 

जितुले आफूहरु रिलको हिरो र मेयर हर्क साम्पाङ रियल हिरो भएको बताए। साम्राज्ञी र जितुको मुख्य भूमिका रहेको फिल्म ‘ह्यारीकी प्यारी’ माघ २० गते रिलिज हुँदैछ।