कमलपोखरीमा मनाइँदै भूकम्प सुरक्षा दिवस

काठमाडौं– यस वर्षको २५औं भूकम्प सुरक्षा दिवस काठमाडौंको कमलपोखरीमा मनाइने भएको छ। आगामी २ माघमा भूकम्प सुरक्षा दिवस मनाउन काठमाडौं महानगरमा भएको छलफलमा व्यवस्थापन उपसमितिको बैठकले यस्तो निर्णय गरेको हो।

छलफलमा नगर उपप्रमुख सुनिता डंगोलले दिवस अवसरमा सुरु हुने कार्यक्रमलाई महानगरले वर्षैभरि सञ्चालन गर्ने जनाउँदै विद्यालयको सुरक्षित भौतिक संरचनाका लागि विद्यालय स्तरमा गएर जानकारी दिइने बताइन्। 

बैठकमा प्रमुख प्रशासकीय अधिकृत वसन्त अधिकारीले मानिसले भूकम्प बिर्सिंदै गएर भवन संहिता पालनामा पनि लापर्वाही गर्न थालेको स्मरण गराए।अनधिकृत संरचना आफैं व्यवस्थापन गर्न सम्बन्धितका नाममा सार्वजनिक सूचना जारी गरिएको र अटेर गर्नेलाई कारबाही प्रक्रिया अगाडि बढाइने महानगरले जनाएको छ।  

१८ पुसमा भूकम्प सुरक्षा दिवस मूल समारोह समिति संयोजक, उपप्रधान एवं गृहमन्त्री रवि लामिछानेको संयोजकत्वमा बसेको बैठकले महानगरको संयोजकत्वमा व्यवस्थापन उपसमिति गठन गरेको थियो। त्यसैगरी सहरी विकास तथा भवन निर्माण विभागको संयोजकत्वमा प्रचार प्रसार उपसमिति गठन गर्ने निर्णय गरिएको थियो। बैठकले यस वर्षका लागि ‘भूकम्प सुरक्षित पूर्वाधार, सुरक्षित जीवनको आधार’ नारा तय गरेको छ। 

२ माघ १९९० को विनाशकारी भूकम्पले पु¥याएको क्षतिको सम्झना गर्दै अबका पुस्ताले यस प्रकारको क्षति बेहोर्नु नपरोस् भनेर सजग गराइराख्न यो दिवस मनाउने गरिएको छ। 

२०५५ देखि हरेक वर्ष २ माघमा भूकम्प सुरक्षा दिवस मनाउन थालिएको हो। भूकम्पलाई विज्ञानसँग जोडेर २०५७ सम्म विज्ञान तथा प्रविधि मन्त्रालयले कार्यक्रम आयोजना गरेको थियो। २०५८ देखि गृहमन्त्रीको संयोजकत्वमा मूल समारोह समिति गठन गरेर दिवस मनाउन थालिएको हो।