निर्वाचन सामग्री ढुवानी धमाधम

हालसम्म समानुपातिकतर्फको प्रतिनिधिसभा तथा प्रदेशसभाका मतपत्र ८ वटाबाहेकका जिल्लामा ढुवानी भइसकेको छ।

नेपाल समय | शनिबार, कात्तिक १२, २०७९

नेपाल समय

शनिबार, कात्तिक १२, २०७९

काठमाडौं– निर्वाचन आयोगले मतपत्र तथा निर्वाचन सामग्री ढुवानीलाई तीव्रता दिइएको बताएको छ।

आयोगका अनुसार हालसम्म समानुपातिकतर्फको प्रतिनिधिसभा तथा प्रदेशसभाका मतपत्र ८ वटाबाहेकका जिल्लामा ढुवानी भइसकेको छ भने केही दुर्गम जिल्लामा बाटोघाटो अवरोध भएका कारण मतपत्र ढुवानी बाँकी रहेको छ।

प्रत्यक्षतर्फका मतपत्र अबका केही दिनमा दुर्गम जिल्लाबाट ढुवानी क्रम सुरु गरिने आयोगले जनाएको छ।

आयोगले शुक्रबारदेखि विभिन्न ५७ प्रकारका निर्वाचन सामग्री मतपेटिका, छेकाबार, स्वस्तिक छापलगायत ढुवानी सुरु गरेको छ। सुदूरपश्चिम, कर्णाली र पूर्वाञ्चलका जिल्लामा उक्त निर्वाचन सामग्री ढुवानी सुरु गरिएको हो।

अब दुर्गम जिल्लामा निर्वाचन सामग्री ढुवानी गरिने, त्यहाँबाट जिल्ला निर्वाचन कार्यालयमार्फत ती सामग्रीलाई सम्बन्धित निर्वाचन अधिकृतलाई बुझाउने र निर्वाचन अधिकृतले मतदान अधिकृतलाई बुझाउनेछन्।

आयोगले पूर्वनिर्धारित कार्यतालिकाअनुसार १६ कात्तिकभित्रै निर्वाचन सामग्री ढुवानी कार्य भइरहेको जनाएको छ।

प्रकाशित: Oct 29, 2022| 12:10 शनिबार, कात्तिक १२, २०७९