डेंगु नियन्त्रण अभियान चलाएको भन्दै गगन थापालाई दोस्रो पटक स्पष्टीकरण

काठमाडौं- निर्वाचन आयोगले नेपाली कांग्रेसका महामन्त्रीसमेत रहेका काठमाडौं-४ का उम्मेदवार गगनकुमार थापालाई पुनः स्पष्टीकरण सोधेको छ। कात्तिक ८ गते डेंगुविरुद्ध अभियान चलाएको विषयमा स्पष्टीकरण सोधेको आयोगले दोस्रो पटक उनलाई सोही अभियानका विषयमा स्पष्टीकरण सोध्दै पत्र काटेको हो। 

आयोगले स्पष्टीकरण सोधेपनि डेंगु नियन्त्रण अभियान बन्द नहुने वक्तव्य थापाले दिएको भन्दै पुनः स्पष्टीकरण सोधिएको आयोगले जनाएको छ।

निर्वाचन आचारसंहिता, २०७९ को दफा ५ को खण्ड (ख) मा नेपाल सरकार, प्रदेश सरकार, मन्त्री र स्थानीय कार्यपालिका तथा सोका पदाधिकारीले 'सरुवा रोगको महामारी वा कुनै प्राकृतिक विपद् वा काबुबाहिरको परिस्थिति सिर्जना भएमा आयोगको स्वीकृति लिई त्यस्ता कार्यक्रम सञ्चालन गर्न बाधा नपर्ने' उल्लेख छ। 

थापाको डेंगु नियन्त्रण अभियान कानुनको खिलाफ भएको आयोगको दाबी छ। 

थापालाई आयोगको प्रश्न छ, 'तपाईंले डेंगु नियन्त्रण अभियान चलाउछु भने जस्तै अन्य उम्मेदवारले पनि वक्तव्य दिँदै हिँडेमा निर्वाचनको स्वच्छता र निष्पक्षतामा प्रतिकूल असर पर्छ, पर्दैन?' स्पष्टीकरण पेस गर्न थापालाई २४ घण्टाको समयावधि दिइएको छ।