गह्रौंसुर मन्दिरमा ८ लाख भेटी संकलन

स्याङ्जा- स्याङ्जा जिल्लाको प्रसिद्ध धार्मिकस्थलका रूपमा परिचित गह्रौंसुर कालिका मन्दिरमा बडादशैंको अवधिभरमा ८ लाख रुपैयाँ बढी भेटी संकलन भएको छ।

स्याङ्जाको वालिङ–८ र गल्याङ नगरपालिका–१० को संगमस्थलमा अवस्थित गह्रौंसुर मन्दिरमा बडादशैंको घटस्थापनादेखि कोजाग्रात पूर्णिमाको दिनसम्ममा ८ लाख १६ हजार ४६० रुपैयाँ संकलन भएको गह्रौंसुर धार्मिक एवं पयर्टकीय केन्द्रका कोषाध्यक्ष केशभक्त गुरुङले जानकारी दिए।

कोषाध्यक्ष गुरुङका अनुसार मन्दिरमा चढाइएको भेटी, पाठाको टाउको बिक्री, परेवा बिक्री, टीका थाली, दान पेटिका, होटल, पसल, सहयोग रसिद शीर्षकमा भेटी संकलन भएको हो।

बडादशैंको अवधिभर पूजा व्यवस्थापनका लागि २ लाख ७० हजार ८५ रुपैयाँ खर्च भएको उनले बताए। खर्च कटाएर बचत भएको ५ लाख ४६ हजार ३७५ रुपैयाँले मन्दिरमा पुजारीको पारिश्रमिक, लिफ्टिङ खानेपानी मर्मत, रंगरोगनका लागि खर्च गरिने छ। 

तत्कालीन बाइसे/चौबीसे राज्यअन्तर्गतको गह्रौंकोट राज्यका प्रथम राजा दशरथ खाणको समयमा स्थापित ऐतिहासिक एवं पुरातात्विक महत्त्वको यस मन्दिर ५५० वर्ष पुरानो मानिन्छ।