पाल्पामा भुस्याहा कुकुरको टोकाइबाट २८ जना घाइते

पाल्पा- पाल्पाको माथागढी गाउँपालिका भित्रका ठाउँमा भुस्याहा कुकुरको टोकाइबाट एकै दिन २८ जना घाइते भएका छन्। 

घाइतेहरूको तानसेनस्थित युनाइटेड मिसन अस्पतालमा उपचार भइरहेको छ। यस क्षेत्रका चिदीपानी, रुप्से र कसेनीलगायतका स्थानमा कुकुरले मानिस र पशु चौपायलाई टोक्ने गरेको स्थानीयको गुनासो छ। सो क्षेत्रमा केहि दिनयता भुस्याहा कुकुरको विगविगी बढेको छ।

बिहिबार भुस्याहा कुकुरको टोकाइबाट २८ जना घाइते भएका छन्। माथागढीको वडा नम्बर १, चिदीपानी, २ रुप्से र ३ कसेनीका मानिसलाई भुस्याहा कुकुरले टोकेर घाइते बनाएको माथागढी–१ चिदीपानीका वडा अध्यक्ष राजकुमार पन्थीले बताए।

भुस्याहा कुकुरले कोहीलाई अनुहार, खुट्टा तथा हातका विभिन्न भागमा टोकेको छ । माथागढी १ को चिदीपानी बाहाखोक, कुनाबारी, ढकालकुना, दोहोरा, सोले खहरे, सराइ आसपासमा कुकुरले टोकेको हो।

२८ जनामध्ये तीन जनाको सामान्य उपचारपछि घर फर्किएको माथागढी-३, का अध्यक्ष तेजबहादुर घर्तीमगरले बताए। अन्य २५ जनाको मिसन अस्पतालमा रेबिजविरुद्धको इन्जेक्सन लगाएपछि थप उपचार भइरहेको उनको भनाई छ।