२० जिल्लाका सवा करोड मतपत्र छापिए

काठमाडौं– आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि बिहीबारसम्म २० जिल्लाका मतपत्र छापिएका छन्।निर्वाचन आयोगका अनुसार २० जिल्लाका लागि १ करोड २८ लाख ४९ हजार ५ सय मतपत्र छापिएका हुन्। प्रदेशसभातर्फ ६४ लाख ३२ हजार ५ सय र प्रतिनिधिसभातर्फ ६४ लाख १७ हजार मतपत्र छन्।

प्रत्यक्ष निर्वाचनका लागि देशभर १ करोड ७९ लाख ८८ हजार ५७० मतदाता छन्। उनीहरूका लागि करिब ४ करोड मतपत्र छापिने आयोगले जनाएको छ। समानुपातिकतर्फका करिब ४ करोड मतपत्र आयोगले छापिसकेको छ।

आयोगका अनुसार प्रत्यक्षतर्फ सल्यान, डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम पश्चिम, सुर्खेत, बाजुरा, बझाङ, डोटी, दार्चुला, बैतडी र डडेल्धुराको प्रत्यक्षतर्फको मतपत्र छपाइ भइसकेको छ।

त्यस्तै, प्रदेशसभाका लागि सल्यान, डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम पश्चिम, सुर्खेत, बाजुरा, बझाङ, दार्चुला, बैतडी र अछामको मतपत्र छपाइ सम्पन्न भएको छ।