आयोगको अनुमतिबिना चुनाव प्रचारमा हिँड्ने मन्त्रीलाई रोक लगाउन निर्देशन

काठमाडौं– निर्वाचन आयोगले आफ्नो अनुमतिबिनै चुनाव प्रचारमा जाने मन्त्री र स्थानीय तहका कार्यपालिका सदस्यलाई रोक लगाउन सुरक्षा अधिकारीलाई निर्देशन दिएको छ।

आचारसंहिता अनुगमन समिति बैठकमा आयोगको टोलीले मन्त्री र जनप्रतिनिधिलाई आचारसंहिता उल्लंघन हुने गरी कार्यक्रममा रोक लगाउन सुरक्षा अधिकारीलाई निर्देशन दिएको हो।

छलफलमा सुरक्षा निकायका अधिकारीले उच्चपदस्थ सरकारी अधिकारीलाई कार्यक्रममा सहभागी हुन बन्देज लगाउन कठिन हुने धारणा राखेका थिए। तर प्रमुख निर्वाचन आयुक्त दिनेशकुमार थपलियाले सबै उम्मेदवारलाई समान व्यवहार गर्नुपर्ने भन्दै आचारसंहिता उल्लंघन हुने गतिविधि भए मौन नबस्न निर्देशन दिएका हुन्।

‘मन्त्री, मुख्यमन्त्री वा स्थानीय तहका जनप्रतिनिधि जो कोही आउनुभयो भने पनि निर्वाचन आयोगको अनुमतिपत्र छ भनी सोध्नुहोला भनी निर्देशन दिएका हौं’, प्रमुख आयुक्त थपलियाले भने, ‘आयोगको अनुमति छैन भने उहाँहरूलाई ससम्मान सलाम ठोक्नुहोस्, अनि नियन्त्रणमा लिएर आयोगलाई खबर गर्नुहोस्। बाँकी प्रक्रिया हामी अघि बढाउँछौं भनेका छौं।’ यसबारे गृहसचिवलाई समेत बोलाएर सबै सुरक्षा निकायलाई सर्कुलर गर्नू भनी निर्देशन दिइएको उनले बताए।

संघीय सरकार र प्रदेश सरकारका मन्त्रिपरिषद् सदस्यले आफू उम्मेदवार भएबाहेक अन्यत्र निर्वाचन प्रचार–प्रसारमा भाग लिन पाउँदैनन्। दलको प्रचारकको हैसियतले भाग लिनुपर्ने भए उनीहरूले निर्वाचन आयोगबाट अनुमति लिनुपर्छ। उनीहरूले सरकारी स्रोत साधन उपयोग गर्न पाउँदैनन्।