नेपालबाट मनसुन बाहिरिने चरणमा

काठमाडौं- नेपालबाट यस वर्षको मनसुन बाहिरिने चरणमा पुगेको छ। अहिले मनसुनी वायुको प्रभाव कमजोर बनेर बाहिरिने चरणमा रहेको मौसम पूर्वानुमान महाशाखाले जनाएको छ।

नेपालबाट मनसुन बाहिरिने औसत समय अक्टोबर दुई तारिख हो। तर, मनसुन औसत समयभन्दा झन्डै दुई हप्ता लम्बिसकेको छ। 

अहिले कर्णाली प्रदेश लगायत देशको पहाडी भूभागमा आंशिक बदली रही बाँकी भूभागमा मौसम सामान्यतया सफा रहेको छ। 'हाल नेपालमा बलियो मनसुनी प्रणाली छैन। अब नयाँ मनसुनी प्रणाली भित्रिने पनि देखिँदैन। मनसुन बाहिरिने क्रममा रहेकाले बाहिरिएको औपचारिक घोषणाका लागि अन्तिम तयारीमा रहेको छ,' माहाशाखाले भन्यो।

आज दिउँसो  सुदूरपश्चिम र कर्णाली प्रदेशका एक/दुई ठाउँमा चट्याङसहित सामान्य पानी सम्भावना रहेको छ। राति देशको पहाडी भूभागमा आंशिक बदली रही बाँकी भूभागमा मौसम सामान्यतया सफा रहनेछ।

देशको पहाडी क्षेत्रको सडक तथा हवाई यातायातमा मौसमको सामान्य प्रभावको सम्भावना रहेकोले आवश्यक सतर्कता अपनाउन महाशाखाले अनुरोध गरेको छ।