निर्वाचन आयोगले उठायो साढे ३ करोड जरिमाना

काठमाडौं– निर्वाचन आयोगले स्थानीय तह निर्वाचनमा उम्मेदवारी दिएर खर्च विवरण नबुझाएका उम्मेदवारबाट करिब साढे ३ करोड रुपैयाँ जरिमाना संकलन गरेको छ।

जरिमाना नबुझाएसम्म नाम नकारात्मक सूचीबाट नहटाउने र प्रतिनिधिसभा तथा प्रदेशसभा निर्वाचनमा उम्मेदवार बन्न नदिने भएपछि उनीहरुले धमाधम जरिमाना तिरेका हुन्।

स्थानीय तहमा उम्मेदवार भएका कतिपय व्यक्ति प्रतिनिधिसभा र प्रदेशसभामा समेत उम्मेदवार बन्न खोजेका थिए। जरिमाना नबुझाएसम्म आयोगले आफ्नो प्रणालीमा नाम इन्ट्री गर्न नदिने भएपछि उनीहरुले जरिमाना बुझाएको आयोगका प्रवक्ता शालिकराम शर्मा पौडेलले बताए।

आयोगका अनुसार आइतबारसम्म ९६ जनाले ३ करोड ५५ लाख रुपैयाँ जरिमाना बुझाएर आफू उम्मेदवार बन्ने बाटो खोलेका छन्। तीमध्ये ७६ जनाले आयोगमै पुगेर जरिमाना बुझाएका थिए। आयोगले कान्तिपथ र अन्य निर्वाचन कार्यालयबाट जरिमाना बुझाउन सकिने व्यवस्था गरेको थियो।