गुल्मीमा खुल्यो मुख्य निर्वाचन अधिकृतको कार्यालय

गुल्मी- आगामी ४ मंसिरमा हुने प्रतिनिधिसभा र प्रदेशसभा निर्वाचनका लागि गुल्मीमा मुख्य निर्वाचन अधिकृतको कार्यालय स्थापना भएको छ।

सदरमुकाम तम्घासमा मुख्य निर्वाचन अधिकृतको कार्यालय र निर्वाचन अधिकृतको कार्यालय स्थापना गरिएको हो।

निर्वाचनका लागि उम्मेदवारको मनोनयन दर्ता गर्ने समय नजिकिएसँगै रेसुंगा नगरपालिकामा रहेको जिल्ला अदालत गुल्मीमा मुख्य निर्वाचन अधिकृतको कार्यालय स्थापना गरिएको जिल्ला निर्वाचन कार्यालयका प्रमुख अधिकृत माया कुँवरले बताइन्। मुख्य निर्वाचन अधिकृतको रुपमा जिल्ला न्यायाधीश वसन्तराज पौडेल छन्।

मुख्य निर्वाचन अधिकृतको कार्यालय स्थापनासँगै निर्वाचन अधिकृतको कार्यालय पनि स्थापना गरिएको कुँवरले जानकारी दिइन्। २ निर्वाचन क्षेत्र रहेको जिल्लामा मुख्य निर्वाचन अधिकृतको कार्यालयले क्षेत्र नम्बर–१ हेर्ने जिम्मेवारी तोकिएको छ।

निर्वाचन क्षेत्र नम्बर–२ को कार्यालय रेसुंगा नगरपालिकाको शिक्षा विकास समन्वय इकाइ कार्यालयमा स्थापना गरिएको छ।

गुल्मीमा निर्वाचनका लागि २ लाख २३ हजार ६१५ जना मतदाता छन्। यीमध्ये महिला १ ला १३ हजार २९८ रहेका छन् भने पुरुष १ लाख १० हजार ३१७ जना छन्।

जिल्लाका २ निर्वाचन र ४ प्रदेशसभा निर्वाचनका लागि २७८ वटा मतदान केन्द्र रहेका छन्।

निर्वाचन क्षेत्रअनुसार क्षेन नम्बर १ मा १ लाख १९ हजार २८८ जना मतदाता छन् भने क्षेत्रनम्बर २ मा १ लाख ४ हजार ३२७ जना मतदाता रहेका छन्।

निर्वाचनका लागि क्षेत्र नम्बर १ मा १५० र क्षेत्र नम्बर २ मा १२८ वटा मतदान केन्द्र रहेको जिल्ला निर्वाचन कार्यालयका सूचना अधिकारी मेघलाल पाण्डेले बताए।