सरसफाइमा जागरण ल्याउँदैछ विराटनगर

विराटनगर- प्रदेश १ को राजधानीसमेत रहेको विराटनगर महानगरपालिकामा दैनिक करिब ७० टन फोहोर निस्कने गरेको छ। चाडपर्वका समयमा थप वृद्धि भएर दैनिक ९० टनसम्म पुग्ने गरेको छ। 

फोहोरको मात्रा बढ्दै गएपछि विराटनगर महानगरपालिकाले नगरका चोक, गल्लीमा सरसफाइ अभियान सुरु गरेको छ। कार्यपालिका बैठकबाटै निर्णय गरेर नगरपालिकाले अभियान शुरुवात गरेको हो। भदौ पहिलो साता महानगर प्रमुख नागेश कोइरालाले अभियानको शुरुवात गरेका थिए। पहिलो पटक विराटनगर रथयात्रालाई केन्द्रित गरेर सफाई अभियानको थालनी गरिएको थियो। 

प्रमुख कोइरालाले कुनै पनि ठाउँको पहिचान सरसफाइले निर्धारण गर्ने भएकाले महानगरले सफाइ अभियानलाई प्राथमिकता दिएको बताए। 'बाहिरबाट आउने पर्यटकले झट्ट हेर्दा सहरमा जताततै फोहोर देखे भने उनीहरूमा नकारात्मक असर पर्छ। मन्दिर, मस्जिद र सार्वजनिकस्थलमा भिख माग्ने, फुटपाथ खाली गर्ने, छाडा चौपाया नियन्त्रण गर्ने अभियानलाई पनि तीव्रता दिएको छ,' उनले भने। 

महानगरका १९ वडालाई ३ भागमा वर्गीकरण गरेर अभियान चलाइएको छ। उत्तरी क्षेत्र, मध्य क्षेत्र र दक्षिणी क्षेत्र गरेर हरेक साताको शुक्रबार बिहान ७ बजेदेखि साढे ८ बजेसम्म अभियान सञ्चालन हुने गरेको महानगरका वातावरण तथा विपद् व्यवस्थापन महाशाखा प्रमुख राजेन्द्र प्रधानले बताए।  अभियान सुरु भएपछि हरेक साता सहभागिता बढ्दै गएको उनले बताए। उनका अनुसार तीन क्षेत्रमा एकै पटक अभियान सञ्चालन गर्ने गरिएको छ। तीनै वटै क्षेत्रमा महानगरका प्रमुख, उपप्रमुख र प्रमुख प्रशासकीय अधिकृतले नेतृत्व लिँदै आएको प्रधानको भनाइ छ। 

उपप्रमुख कार्की झाडु लगाउँदै सडक सफाईमा लागेपछि स्थानीयबासीहरुले उनलाई साथ दिएका थिए। सफाई अभियानले स्थानीयमा जागरण ल्याएको उप्रमुख कार्कीले बताइन्। ‘अभियान निरन्तर चल्ने छ। सडक सफाई शुरु भएपछि सहभागिता बढ्दै जानुले थप हौसला मिलेको छ,' उनले बताइन्।