मोदीले भने, 'नेपालमा राजनीतिक स्थिरता'

काठमाडौं- भारतीय प्रधानमन्त्री नरेन्द्र मोदीले राजनीतिक स्थिरताका कारण नेपाल प्रगति पथमा लम्किरहेको बताएका छन्।

‘सबै नेपाली जनताको जीवन मंगल बनाउन भारत हमेशा तपाईंहरूको साथमा छ,’ उनले भने, ‘नेपाल र भारतबीचको सम्बन्ध भगवान पशुपतिनाथको कृपाले कायम रहोस्।’

दुई देशबीचको ऐतिहासिक सम्बन्ध अनमोल सम्पति भएको उनले बताए। ‘सबैको सुख र खुशीको चाहना दुवै देशको मान्यता हो,’ मोदीले भने, ‘शोषित पीडित जनताको उत्थान र विकासको चाहना हामी दुवै देशको समान लक्ष्य छ।’

नेपाल–भारत मैत्री पशुपति धर्मशालाका कारण नेपाल र भारतबीचको सम्बन्ध मन मन्दिरमा रहिरहने उनको भनाइ थियो। ‘यो धर्मशाला हाम्रो सम्बन्धको प्रतीक हो।’ पशुपति घुम्न आउने पर्यटकका लागि उक्त धर्मशाला सहयोगी बन्ने विश्वास उनले व्यक्त गरे।

‘नेपाल र भारतबीचको सम्बन्ध विश्वका अन्य कुनै पनि देशको छैन। काठमाडौं र नयाँदिल्लीको मिलन भयो भने सबै नेपाली र हिन्दुस्तानीको ठूलो तागत र शक्ति आर्जन हुनेछ,’ प्रधानमन्त्री मोदीले भने।

सवा करोड भारतीय जनताका तर्फबाट शिवभक्त हुनुको नाताले उक्त धर्मशाला भारत सरकारले निर्माण गरेको मोदीले बताए। पशुपति र कन्याकुमारीको दुई हजार वर्षअघिको सम्बन्ध रहेको उनले बताए। दक्षिण भारतीय नागरिकको पशुपतिनाथप्रति ठूलो आशक्ति रहेको बताए।

भारतीय पर्यटकहरू धौलागिरि, अन्नपूर्ण, सगरमाथासम्म आउने गरेको र त्यही क्रममा शिवभक्तको मुखमा ‘ऊँ नमः शिवाय’ निस्किने गरेको मोदीले बताए।

नेपालको लुम्बिनी भगवान गौतमबुद्धको जन्मस्थल र भारतको कुसीनगर, गयालाई जोड्ने काम भइरहेको उनले बताए। यसबाट विश्वमा देखिएको हिंसा र आतंकलाई शान्तिको मार्गमा हिँडाउन प्रेरणा मिलिरहेको उनले बताए।