जनकपुरमा नगर प्रहरीको दादागिरी

जनकपुरधाम- जनकपुर उपमहानगरपालिका कार्यालयले भर्ना गरेको नगर प्रहरीले दादागिरी गर्दै हातपात गर्ने गरेको स्थानीयहरुले आरोप लगाएका छन् । सडक तथा फुटपाथ व्यवस्थापन गर्ने नाउँमा नगर प्रहरीले व्यवसायी देखि सर्वसाधरणलाई हातपात गरी दुव्र्यवहार गर्ने गरेको स्थानीयवासीको आरोप छ ।

विहिबार साँझ स्थानीय भानु चोकमा एकजना पत्रकार र केहि व्यवसायीहरुलाई हातपात गरेपछि प्रहरीले उनीहरुलाई नियन्त्रणमा लिनु पर्‍यो ।

सडक पेटी खालि गराउन निस्केका नगरप्रहरीले केहि स्थानीय व्यवसायीमाथि हातपात गरेको थियो । र, त्यस घटनाको फोटो खिच्न थालेपछि नगरप्रहरीले पत्रकार राहुल सिंहको मोबाइल खोसी भुँईमा फ्यालेर तोडेको छ । पत्रकार सिंहका अनुसार आफूले स्थानीय व्यवसायीहरुसँग भइरहेको विवादको फोटो खिच्न थालेपछि नगरप्रहरीले दुव्र्यवहार गर्नुका साथै मोबाइल खोसेर फुटाइदिएको छ ।

कानून र अधिकार क्षेत्र मिच्दै नगर प्रहरीले देखाएको व्यवहारको स्थानीय व्यवसायीहरुले विरोध गरेपछि प्रहरीले तत्काल उनीहरुलाई नियन्त्रणमा लिएको थियो । स्थानीयहरु विरोधमा उत्रिएपछि ध्रुव मिश्र भन्ने नगर प्रहरी फरार भएपनि अन्यलाई जिल्ला प्रहरी कार्यालय पुर्‍याइएको थियो ।

धनुषाका प्रहरी उपरीक्षक गोविन्द थपलियाले स्थानीयवासीसँग विवाद हुँदा नगर प्रहरीलाई नियन्त्रणमा लिइएको जानकारी दिए । नगर प्रहरी होस वा अन्य कोहि कसैमाथि हातपात तथा दुव्र्यवहार गर्नु गलत रहेको थपलियाले बताए । उपमहानगरपालिकाको एकजना कर्मचारीको जमानीमा नियन्त्रणमा लिइएका नगर प्रहरीहरुलाई छोडिएको उनले जानकारी दिए ।

उपमहानगरपालिकाले अनियमित तरिकाले भर्ना गरेको नगर प्रहरी गुण्डा शैलीमा प्रस्तुत हुनेगरेको नेपाल चेम्बर्स अफ कमर्स जनकपुरका उपाध्यक्ष सरोज मिश्रले आरोप लगाएका छन् । आफ्नो मनोमानी र हैकमवादी प्रवृत्तिले उपमहानगरपालिका चलाउने सोँच परिवर्तन गरी असभ्य कर्मचारीलाई तत्काल बर्खास्त गर्न उनले माग गरेका छन् ।