नेपालको लगातार दोस्रो हार : आजपनि चलेन ब्याटिङ

काठमाडौं- नेपाल एसिया कप छनोटको आफ्नो दोस्रो खेलमा संयुक्त अरब इमिरेट्स (युएई) सँग ७८ रनले पराजित भएको छ । युएईद्धारा दिएको २ सय ५५ को लक्ष्य पछ्याउतने क्रममा नेपालले ४८.५ ओभरमा सबै विकेट गुमाउदै एक सय ७६ रन मात्र बनाउन सक्यो । मलेसियामा जारी छनोटको दोस्रो खेलमा टस जितेर पहिले फिल्डिङ रोजेको नेपालविरुद्ध युएईले ९ विकेटको क्षतिमा २ सय ५४ रन जोडेको थियो ।

नेपालका लागि ओपनर ब्याट्सम्यान सुवास खकुरेलले अर्धशतक बनाएका थिए । उनले ९७ बल खेल्दै दुई चौका र एक छक्काको मद्दतमा ५० रन जोडे । त्यस्तै मध्यक्रमका ब्याट्सम्यान दिपेन्द्र सिंह ऐरीले ४० रन जोडे । उनले ६४ बल खेल्दै दुई चौकाको मद्दतमा ४० रन जोडेका थिए ।

नेपालले चार रन जोड्दा पहिलो विकेटको रुपमा उपकप्तान ज्ञानेन्द्र मल्ललाई गुमाउन पुग्यो । त्यसपछि मैदान छिरेका कप्तान पारस खड्का पनि २० बल खेल्दै तीन चौकाको मद्दतमा १६ रन जोड्दै आउट हुन पुगे । सधै कप्तान खड्कामा निहित नेपाली क्रिकेट टिम खड्का नचल्दा अन्य ब्याट्सम्यानको ब्याटिङ पनि धरमराउने उही कमजोरी यस खेलमा पनि देखीयो । दोस्रो विकेटको रुपमा नेपालले खड्कालाई गुमाउदा त्यसपछिका ब्याट्सम्यानहरु पनि लगातार पेभिलियन फर्किन थाले । 

सुवास र दिपेन्द्रको जोडीले धरमराएको नेपाली ब्याटिङलाई उकास्ने प्रयास गरेपनि सुवास ५० रन जोड्दै आउट हुन पुगे । त्यसपछिका ब्याट्सम्यनहरुले दोहोरो  अंक नछुदै पेभिलियन फर्किए । तर, अन्त्य तिर मैदान प्रवेश गरेका तिब्रगतीका बलर सोमपाल कामीले २७ तथा कसन्त रेग्मीले १२ रन जोडे । मोमनसँगको खेलमा नेपाका लागि सर्वाधिक ८३ रन जोडेका सागर पुन ३ रनमा आउट भए ।

युएईका लागि अहमद राजाले ४, मोहमद नाभिदले ३ र आमिर हायातले एक विकेट लिए । यसअघि युएईका ओपनर चिराग सुरीले अर्धशतक पुरा गरेका थिए । ९१ बल खेलेका चिगारले ७ चौका र १ छक्कासहित ६५ रन जोडे । 

अर्का ओपनर असफाद अहमदले ४५, रमिज साहजादले ३५, अद्नान मुफ्तीले ४१ रन जोडे । नेपालका लागि सन्दीप लामिछानेले सर्वाधिक ४ विकेट लिदा बसन्त रेग्मी र सोमापाल कामीले समान २ विकेट लिए । ओमानसँगको पहिलो खेलमा नेपाल ७ विकेटले पराजित भएको थियो ।