प्रदेश सरकारले दियो शहीद परिवारलाई रोजगारी

जनकपुरधाम- प्रदेश २ सरकारले मधेश आन्दोलनका शहीद परिवारलाई रोजगारीको व्यवस्था मिलाएको छ। 

तेस्रो मधेश आन्दोलनका प्रथम शहीद राजिव राउतकी श्रीमती निलम देवी राउतले प्रदेश सरकारले रोजगारी दिएको हो। राउतसँगै अहिलेसम्म शहीद परिवारका दुईजना सदस्यलाई प्रदेश सरकारले रोजगारी दिइसकेको छ। यसअघि प्रदेश २ सरकारले शहीद रामविवेक यादवकी श्रीमती अनिला यादवलाई रोजगारी दिएको थियो।

प्रदेश सरकारले निलम र अनिला दुवै जनालाई मुख्य न्यायाधिवक्ताको कार्यालयमा रोजगारी दिएको मुख्यमन्त्री तथा मन्त्रीपरिषद कार्यालयले जनाएको छ।
मंगलबार प्रदेश मुख्य न्यायधिवक्ताको कार्यालयमा आयोजना गरिएको एक कार्यक्रमकाबीच मुख्यमन्त्री लालबाबु राउतले शहीद पत्नी निलमलाई नियुक्तिपत्र हस्तान्तरण गरेका थिए।

प्रदेश २ को सरकारको पहिलो मन्त्रीपरिषद बैठकले प्रत्येक शहीद परिवारलाई रोजगारी दिने निर्णय गरेको थियो। मधेश आन्दोलनका शहीद परिवार रोजगारी तथा घाइते सहायता निर्देशिका २०७५ मा शहीद परिवारका सदस्यलाई योग्यता तथा क्षमता अनुसार रोजगारीको व्यवस्था गरिने उल्लेख छ।