प्रदेश १ को नाम पहिचानको आधारमा राख्न माग

इटहरी-भदौ भित्र प्रदेश १ को नामाकरणको टुंगो लाग्ने प्रदेश सरकारले सार्वजनि रुपमा बताइरहँदा प्रदेशका साना दलहरुले पहिचानका आधारमा नाम राख्नुपर्ने बताएका छन । नामाकरणको विषयम प्रदेश सभामा प्रवेश नभएकाले उनीहरु विभिन्न मञ्चहरुमा यस्तो बताउँदै आएका छन ।

सत्तापक्ष नेकपा र प्रमुख प्रतिपक्ष नेपाली कांग्रेसले नामको बिषयमा पहिचान वा सामथ्र्य कुन आधारमा राख्ने भनेर बोलेका छैनन । तर, तीन सिट प्रदेश सांसद क्षमताको संघीय समाजवादी फोरम नेपाल र संघीय लिम्बुवान मञ्च  प्रदेश १ को नाम पहिचानको आधारमा हुनुपर्ने बताउँदै आएको छ । 

फोरमका संसदीय दलका नेता जयराम यादव प्रदेश १ आदिवासि जनजाति बाहुल्य प्रदेश भएकाले पहिचानकै नाम हुनुपर्ने बताउँछन । यस्तै, संघीय लिम्बुवान मञ्चकी एक्ली सांसद विष्णु तुम्बाहाम्फे पनि प्रदेश १ को नाम पहिचानको आधारमै हुनुपर्ने बताउँछिन । 

यादव प्रदेशको पहिचानको नामको लागी लिम्बुवान वा किरातमा एक हुनुपर्ने तर्क गर्छन । आफ्नो पार्टी प्रदेशको नाम पहिचानकै आधारमा हुनुपर्ने यादव बताउँछन । उनी भन्छन, ‘सदनमा प्रदेश नामाकरणको बिषय प्रवेश गरेपछि हामी प्रस्टसँग पहिचानकै आधारमा प्रदेशको नाम हुनुपर्नेमा जोडदार माग राख्छौँ ।’
 
संघीय लिम्बुवान मञ्चकी सांसद तुम्बाहाम्फे प्रदेश १ को नाम लिम्बुवान र किरात खम्वुवान हुनुपर्ने बताउँछिन । लिम्बुवान आन्दोलन र किरातको पहिचान दुवै समेट्न लिम्बुवान किरात खम्बुवान हुनुपर्ने उनको तर्क छ । कुनै हालतमा प्रदेश १ को नाम कोशी वा सगरमाथा गरिए स्वीकार्य नहुने उनी बताउँछिन । भन्छिन, ‘बरु प्रदेश १ नै ठीक छ तर कोशी र सगरमाथा मान्दैनौँ ।’ 

९३ सांसद भएको प्रदेश १ मा सत्तापक्ष नेकपाका दुइ तिहाइ  ६७ सांसद छन भने प्रमुख प्रतिपक्षि नेपाली कांग्रेसका २१ सांसद छन । यस्तै, संघीय समाजवादी फोरमका ३ र संघीय लिम्बुवान अनि राप्रपाका १/१ सांसद छन ।