काठमाडौं- मिलन चाम्सको निर्देशनमा तयार भैरहेको चलचित्र ‘बर एन्ड बधु’को प्रदर्शन मिति तय गरिएको छ। रोमानियामा चलचित्रको छायांकन सकेर नेपाल आए लगतै यसको निर्माण टिमले चलचित्रको प्रदर्शन मिति तय गरेको हो।
निर्देशक चाम्सले दिएको जानकारी अनुसार, लभ स्टोरी र कमेडी जनरामा तयार भएको यो चलचित्र फागुणको १९ गतेबाट रिलिज हुनेछ। वितरकसँग सल्लाहा गरेर फागुणलाई प्रदर्शन मिति तय गरिएको चाम्सले बताए। यो चलचित्रमा नायिका आँचल शर्मा र नव–नायक विवेक कर्माचार्यको मुख्य भूमिका छ। रोमानियामा छायांकनका केही तस्वीर समेत निर्माणपक्षले सार्वजनिक गरेको थियो, जसमा आँचल र विवेक रोमान्टिक देखिएका छन्।
एलआरके इन्टरटेन्मेन्टको ब्यानरमा यो चलचित्र तयार भएको हो। चलचित्रका कार्यकारी निर्माता डाक्टर अमित रिजाल हुन्। चलचित्रमा जानुका थापाको लगानी छ। भदौ र असोजपछि नेपाली चलचित्रका निर्माताको आँखा फागुण महिनामा बढी देखिएको छ। मंसिरको निर्वाचन र त्यसलगतै आउने विश्वकप फुटबलका कारण पनि धेरै निर्माता फागुण र चैत्रलाई टार्गेट गरिरहेका छन्।
रोमान्टिक चलचित्रमा मिलन चाम्सले आफ्नो छुट्टै छाप छाडिसकेकाले पनि यो चलचित्र दर्शकका लागि प्रतिक्षामा रहने निश्चित छ।