सुर्खेत : एमालेलाई वर्चश्व जोगाउने चुनौती, गठबन्धनमा अन्तर्घातको डर

सुर्खेत- सरकारले प्रदेश र प्रतिनिधि सभाको मिति घोषणा गरेसँगै राजनीतिक दलहरुको जोडघटाउ पनि सुरु भएको छ। नेताहरू टिकटका लागि लबिइङ तीव्र पारेका छन् भने कार्यकर्ता मतको जोड घटाउमा व्यस्त छन्। २०७४ सालमा भएको प्रदेश र प्रतिनिधीसभा निर्वाचनको नतिजा र हालै सम्पन्न स्थानीय तहको निर्वाचन परिणामका आधारमा अबको निर्वाचन नतिजाको आकलन गर्न थालिएको छ। 

कर्णाली प्रदेशको राजधानीसमेत रहेको जिल्ला भएकाले सुर्खेतमा सबै राजनीतिक दल आफ्नो पक्षमा परिणाम निकाल्न चाहन्छन्। राष्ट्रिय राजनितीमा प्रभाव राख्ने नेताहरूले विगतमा पनि चुनाव लड्दै आएकाले सुर्खेतको नतिजालाई नेताहरूको अस्तित्वसँग पनि जोडेर हेर्ने गरिएको छ। 

नेपाली कांग्रेसका उपसभापति पूर्णबहादुर खड्का, पूर्वमन्त्रीसमेत रहेका कांग्रेसका पूर्वकेन्द्रीय सदस्य हृदयराम थानी, एमालेका पोलिटब्युरो सदस्य यामलाल कँडेल, माओवादी केन्द्रका केन्द्रीय सदस्य नरबहादुर विष्ट, बिन्दमान विष्टलगायतका नेताहरु सुर्खेतकै भएकाले सुर्खेतमा सबै दलको परिणाम निकाल्न चाहन्छन्। 

 स्थानीय चुनावमा तालमेल गरे पनि मत 'ट्रान्सफर' राम्रोसँग नभएकाले आगामी चुनावमा गठबन्धन नै भएपनि जित हासिल गर्नेमा गठबन्धनसम्बद्ध दलकै स्थानीय नेता विश्वस्त छैनन्।

दुई वटा निर्वाचन क्षेत्र रहेको सुर्खेतमा दलले नयाँ अनुहारलाई उम्मेदवारका रूपमा अघि बढाउने सम्भावना कम छ। एमालेबाट क्षेत्र नम्बर १ मा धुर्वकुमार शाही र २ मा यामलाल कँडेल लगभग निश्चित छन्। क्षेत्र नम्बर १ मा नेपाली कांग्रेसमा उपसभापति पूर्णबहादुर खड्का र २ मा पूर्वमन्त्री हृदयराम थानीलाई चुनौती दिने अरु नेता राजनीतिक पर्दामा देखिएका छैनन्। यद्यपि सत्ता गठबन्धनले तालमेल गरी चुनावमा जानुपर्ने भएकाले उनीहरूलाई नै टिकट पाउन सहज छैन। नेकपा माओवादी केन्द्रले गठबन्धनको निर्णयअनुसार जाने बताउँदै आएको छ। माओवादी केन्द्रमा प्रतिनिधि सभामा भन्दा प्रदेश सभामा उम्मेदवार बन्ने आकांक्षी बढी छन्। 

२०७४ को निर्वाचनमा वाम गठबन्धनले सुर्खेत-१ मा कांग्रेसका खड्कालाई हराएको थियो। सुर्खेत-१ मा एमालेका धुव्रकुमार शाही विजयी हुँदा सुर्खेत-२ मा हृदयराम थानीलाई पराजित गर्दै एमालेकै नवराज रावत विजयी भएका थिए। सुर्खेतका चारै प्रदेश सभा निर्वाचन क्षेत्रमा पनि वाम गठबन्धनकै उम्मेदवार विजयी भएका थिए।