‘डान्स कप'को उपाधि रेनुकालाई, प्रवीणले जिते 'भ्वाइस कप'

काठमाडौं- ‘मेरो डान्स कप यूएसए-४ को उपाधि रेनुका राईले जितेकी छन्। अमेरिकाको कोलम्बस सहरमा आयोजना भएको प्रतियोगितकाको फाइनलमा विजेता भएसँगै उनले ताज र १० हजार डलरका साथै टोयोटा र्‍याभ फोर गाडी प्राप्त गरेकी छिन्।

इन्ट्रा नेसनल वेलफेयर एन्ड सपोर्ट फाउन्डेसन अफ अमेरिकाले 'मेरो भ्वाइस कप-२' पनि आयोजना गरेको थियो। उनले पनि १० हजार डलर पुरस्कार र टोयटाको गाडी प्राप्त गरेका छन्।

उत्कृष्ट १२ सम्म अमेरिकामा नै छनोट गरी सेमिफाइनलसम्मका प्रतिस्पर्धा नेपालमा आयोजना भएका थिए। नेपालमा सेमिफाइनल सकेर दुवै रियालिटी शोको युनिट अमेरिका फर्किएका थिए। 

‘मेरो डान्स कप’को फस्ट रनरअप आयुषा समाल भएकी छन् भने सेकेन्ड रनरअप सुमिका तामाङले जितेकी छिन्। ‘मेरो भ्वाइस कप’ तर्फ भने फस्ट रनरअप करण तामाङ बनेका छन् भने सेकेन्ड रनरअपको उपाधि सितल शर्माले जितेकी छिन्।

‘मेरो भ्वाइस कप'का विजेतालाई आयोजक इन्ट्रा फाउन्डेसनका अध्यक्ष डिल्ली अधिकारीले पुरस्कार प्रदान गरेका थिए। यस्तै, ‘मेरो डान्स कप’का विजेतालाई नेपाल विज्ञापन बोर्डका अध्यक्ष लक्ष्मण हुमागाँइले पुरस्कार प्रदान गरेका थिए।

दर्शकहरुको भोटिङका आधारमा विजेता छनोट गरिएको हो। फाइनल कार्यक्रममा वरिष्ठ संगीतकार शम्भुजित बास्कोटा, गायकहरु नरेन्द्र प्यासी, शिव परियार, केशव पौडेल, मनोजराज सिवाकोटी, सुजाता बर्मा, अर्जुन रसाइली, जगदीश समाललगायतले आफ्नो प्स्तुति दिएर दर्शकलाई नचाएका थिए। यस्तै, कार्यक्रममा कलाकारहरु साराङ्गा श्रेष्ठ, दिलिप रायमाझी र केकी अधिकारीले नृत्य प्रस्तुत गरेका थिए।

यो शोमा अमेरिका र क्यानडामा बसोबास गर्दै आएका नेपालीभाषीहरुले प्रतिस्पर्धा गरेका थिए। इन्ट्रा फाउन्डेसनले आउँदो वर्षदेखि ‘मेरो डान्स यूनिभर्स र मेरो भ्वाइस यूनिभर्स’को आयोजना गर्दैछ। ती दुवै विश्वभर छरिएर रहेका नेपालीले भाग लिन सक्ने आयोजकले जानकारी दिएको छ।