गुल्मीमा थपिए ५ हजार बढी नयाँ मतदाता

गुल्मी– गुल्मीमा पछिल्लो पटक ५ हजार बढी नयाँ मतदाता थपिएको जिल्ला निर्वाचन कार्यालय गुल्मीले जनाएको छ। स्थानीय तह निर्वाचनपछि १ असारदेखि सुरु भएको फोटोसहितको मतदाता नामावली संकलन १९ असारसम्म सञ्चालन गरिएको थियो।

उक्त अवधिमा जिल्लामा ५ हजार २१९ नयाँ मतदाता थपिएको जिल्ला निर्वाचन कार्यालय गुल्मीले बताएको हो। निर्वाचन कार्यालयले जिल्ला प्रशासन कार्यालय र निर्वाचन कार्यालय गरी दुई स्थानमा नयाँ मतदाता नामावली संकलन गरेको थियो ।

थपिएका नयाँ मतदातामा पुरुष २ हजार ७७० र महिला २ हजार ४४९ जना रहेको कार्यालयका सूचना अधिकारी मेघलाल पाण्डेले बताए। यो अवधिमा जिल्लाबाहिरका ५९ नयाँ मतदाताको नाम संकलन भएको उनको भनाइ छ।

गत वैशाखमा सम्पन्न स्थानीय तह निर्वाचनमा २ लाख २४ लाख २०७६ मतदाता थिए। दुई निर्वाचन क्षेत्र रहेको गुल्मीमा मतदाताको अनुमानित संख्या २ लाख २९ हजार ४९५ पुगेको छ।–रासस