'ऐना झ्यालको पुतली' को ट्रेलर सार्वजनिक

काठमाडौं– सुजित बिडारी निर्देशित फिल्म ‘ऐना झ्यालको पुतली’ ट्रेलर सार्वजनिक भएको छ।

ट्रेलरमा स्कुले शिक्षा लिन चाहने किशोरीको सपना र त्यसमा आउने अवरोधलाई संकेत गरिएको छ। ट्रेलरले दिदी–भाइको सम्बन्धका आयामलाई पनि प्रस्तुत गरेको छ। फिल्म २४ भदौमा सार्वजनिक हुँदै छ। 

‘ऐना झ्यालको पुतली’ दक्षिण कोरियाको बुसान इन्टरनेसनल फिल्म फेस्टिभल, बंगलादेशको ढाका इन्टरनेसनल फिल्म फेस्टिभल, चेक रिपब्लिकको जलिन फिल्म फेस्टिभल र अस्ट्रेलियाको एसिया प्यासिफिक स्क्रिन अवार्डजस्ता विश्वका प्रतिष्ठित फिल्म फेस्टिभलमा छनोट भइसकेको फिल्म हो।

बुसानमा सबैभन्दा ठूलो पुरस्कार राशि रहेको ‘न्यू करेन्ट सेक्सन’मा छानिने पहिलो नेपाली फिल्मको रूपमा इतिहास बनाएको फिल्मले ढाकामा सुजित बिडारीलाई उत्कृष्ट निर्देशकको अवार्ड विजेता बनाएको थियो।  

लेखक/निर्देशकको रूपमा ‘ऐना झ्यालको पुतली’ फिचर फिल्मतर्फ सुजितको डेब्यू  हो। सुजितले यसअघि ‘सावित्री’को लेखन तथा निर्देशन गरेका थिए, जुन १४ मिनेट अवधिको लघु फिल्म थियो। 

फिल्मले पहाडी जिल्लाको गाउँमा पढ्ने १३ वर्षीया किशोरीको सहरमा गएर पढ्ने सपनालाई विषय बनाएको छ। तर जतिचोटि उनी सपना नजिक पुग्छिन्, कुनै न कुनै बाधा आइपरेर त्यो सपना बिथोलिन्छ। सुजितले किशोरीको पढ्ने सपनालाई ऐनाजस्तो झ्यालमा अड्किएको पुतलीसँग तुलना गरेर कथानक तयार गरेको बताए। ‘ऐना झ्यालमा अड्किएको पुतलीले बाहिर के छ, सबै देख्छ तर जति प्रयास गरे पनि निस्कन सक्दैन। फिल्मको मुख्य पात्रको अवस्था पनि त्यस्तै छ’, सुजितले भने, ‘उसलाई बाहिर निस्कन छ तर हरेक पटक उसको प्रयासमा कहीँ न कहीँ अड्चन आइरहन्छ। यसमा हाम्रो देशका महिलाको पनि प्रतिविम्ब देख्न सक्छौं।’ किशोरी र उनको ९ वर्षीय भाइबीचको बालसुलभ सम्बन्ध पनि फिल्मको रोचक पक्ष रहेको सुजितले बताए। 

फिल्ममा सिरु विष्ट, कञ्चन चिमौरिया, दिनेश खत्री, राज थापा, विशा चाम्लिङ राई, उमेश श्रेष्ठ, मल्लिका श्रेष्ठ आदि कलाकारको अभिनय छ। सिरु विष्टबाहेक फिल्मका अधिकांश कलाकार नयाँ हुन्।  

आइसफल प्रडक्सन, लोकल सिनेमा र आर्को फिल्मको संयुक्त ब्यानरमा बनेको फिल्मलाई आकाश पौडेल, प्रवीन स्याङ्बो, सुजित बिडारी, रामकृष्ण पोखरेल र  सुशान्त श्रेष्ठ मिलेर निर्माण गरेका हुन्।

फिल्ममा अमर महर्जनको छायांकन, किरण श्रेष्ठको सम्पादन, पुष्पासंगमको संगीत, कला संग्रौलाको प्रडक्सन डिजाइन, किशोर आचार्यको साउन्ड डिजाइन र राजेन्द्र मोक्तानको कलर ग्रेडिङ रहेको छ।