सर्जनको हत्यापछि 'टार्गेट'मा थिए सुनील, नक्कली बिहेपछि हुँदै थियो बिमाको तयारी

नेपालगञ्ज- नक्कली विवाह गराइदिएर युवकको हत्या गरी बिमावापतको २ करोड ५० लाख रुपैयाँ हत्याउन सफल भएका बाँके कोहलपुरका सञ्जीव अर्यालले  त्यस्तै प्रकृतिको अर्को पनि षड्यन्त्र रचेको पाइएको छ। बाँकेका सर्जन विकलाई 'डिपेन्डेन्ट भिसा'मा वैदेशिक रोजगारीमा पठाउने प्रलोभन देखाएर युवतीसँग नक्कली विवाह गराइदिएर मोटो रकमका लागि बिमा सम्झौता गराउने र युवकको हत्या गरी बिमाको रकम लिएका सञ्जीवले सोही प्रकृतिको अर्को पनि घटना गराउन षड्यन्त्र रचेको पाइएको हो। 

तर अढाई करोड बिमा रकम लिएको केही समयमै घटनाको पर्दाफास भएपछि मुख्य योजनाकार सञ्जीव अर्यालसहित ६ जनालाई प्रहरीले पक्राउ गरिसकेको छ। घटनामा संलग्न भएको अभियोगमा प्रहरीले सञ्जीवसहित उनको समूहलाई पक्राउ गरेपछि प्रहरीले गरेको अनुसन्धानमा त्यस्तै प्रकृतिको अर्को षड्यन्त्र पनि रचेको रहस्य खुलेको हो। 

बाँके जिल्ला कोहलपुर नगरपालिका-११ बस्ने विपन्न परिवारका २१ वर्षीय सर्जन विकलाई 'डिपेन्डेन्ट भिसा'मा अस्ट्रेलिया पठाउने प्रलोभन देखाई कोहलपुर नगरपालिका-२ कै सपना मल्लसँग कानुनी विवाह गरिदिएका थिए। कानुनी विवाहपछि सर्जनको रिलायन्स लाइफ इन्स्योरेन्स कोहलपुरमा दुई करोड पचास लाख रुपैयाँको बीमा गराएको केही महिनापछि सवारी दुर्घटना गराएर हत्या गरी बिमाबापतको रकम लिएर समूहमा बाँडफाँट गरेका थिए। 

यो घटनाको सम्पूर्ण रहस्य बाहिर आएपछि उनै सञ्जीवले सर्जनलाईजस्तै आत्मीय बनाइसकेका अर्का एक युवकलाई पनि 'डिपेन्डेन्ट भिसामा अस्ट्रेलिया पठाइदिन्छु' भनी एक युवतीसँग कानुनी विवाहसमेत गराइसकेको पाइएको बाँके प्रहरीले जानकारी दिएको हो। 'पक्राउ परेका सञ्जीवले अर्को पनि त्यस्तै आपराधिक योजना बनाएको अनुसन्धानले देखाएको छ,' अनुसन्धानमा संलग्न प्रहरी अधिकारीले भने, 'अनुसन्धान जारी छ। अनुसन्धानसँगै नयाँ तथ्य खुल्दै गएका छन्।'