ब्लिट्ज मिडियाको वैदेशिक रोजगारसम्बन्धी अनुसन्धान सार्वजनिक

काठमाडौं– ब्लिट्ज मिडिया प्रालिले ह्युम्यानिटी युनाइटेडसँगको साझेदारीमा गरेको अनुसन्धान सार्वजनिक गरेको छ।

संस्थाले सरकारी प्रतिनिधि, दूतावासका प्रतिनिधिहरू, आइएनजिओ, यस क्षेत्रका विज्ञहरू, मिडिया र अन्य सरोकारवालाको उपस्थितिमा ‘नेपाल श्रम आप्रवासनमा अनुसन्धान अध्ययन–२०२२’ सार्वजनिक गरेको हो । कार्यक्रममा दुबईकी आप्रवासी कामदार सुष्मा बराल, श्रम आप्रवासनविज्ञ डा गणेश गुरुङ, राष्ट्रिय योजना आयोगका सदस्य डा रामकुमार फुँयाल र श्रम, रोजगार तथा सामाजिक सुरक्षा मन्त्रालयका पूर्वमन्त्री गोकर्ण विष्टलगायतले आफ्नो धारणा राखेका थिए ।

अनुसन्धानले नेपाली आप्रवासी जनसंख्या र तिनका परिवारलाई असर गर्ने विभिन्न मुद्दाहरूमा तीनवटा विभिन्न अनुसन्धान शीर्षक राखी खोजी गरेको छ । वैदेशिक रोजगारीका विभिन्न आयामहरू, उनीहरूको आर्थिक र भावनात्मक दायित्वहरू र नेपाल फर्किएपछि पुनः स्थापनाका चुनौती अनुसन्धानमा समावेश गरेको छ । यसले सुरक्षित आप्रवासका लागि स्थानीय सरकारहरूले खेलेको वर्तमान भूमिकाको जाँचसँगै श्रम आप्रवासनका विभिन्न सरोकारवालालाई सिफारिसहरू पनि समेटेको जनाइएको छ ।

यो अनुसन्धान नेपालभर पुगेर चार हजार ४६ व्यक्तिसँग सर्वेक्षण, एक सय ६८ जनासँगको अन्तर्वार्ता र ५६ वटा विभिन्न लक्षित समूहको छलफलबाट तयार गरिएको ब्लिट्ज मिडियाले जनाएको छ । अनुसन्धानले भविष्यमा सुरक्षित वैदेशिक रोजगारीका लागि र नेपाली आप्रवासी कामदारप्रति सम्मानजनक व्यवहार गर्न देशको श्रम आप्रवासनका विषयमा थप छलफल बढाउने र वैदेशिक रोजगारमैत्री नीति–निर्माणमा सहयोग गर्ने अपेक्षा गरेको जनाइएको छ । 

ब्लिट्ज मिडिया प्रालि पूर्ण एकीकृत अनुसन्धान र मार्केटिङ एजेन्सी भएकाले विभिन्न संस्थाहरूका लागि व्यवसाय र अर्थशास्त्रदेखि समाज र संस्कृतिसम्मका मुद्दाहरूमा सान्दर्भिक अनुसन्धानहरू उत्पादन गर्दै आएको जनाइएको छ ।