प्रदेश १ को नामाकरण : पहिचानका लागि सडक संघर्षमा जान मुख्यमन्त्रीले नै उकासे

विराटनगर- प्रदेश १ को नामाकरणको विषय पेचिलो बन्दै गइरहेको समयमा मुख्यमन्त्री राजेन्द्र राईले पहिचान पक्षधरको पक्षमा नामाकरण नभए सडक संघर्ष गर्न सुझाव दिएका छन्। प्रदेशसभामा रहेका बहुमत सांसदहरु पहिचानको पक्षमा नरहेको भन्दै उनीहरुलाई दबाब दिनुपर्ने उनले बताए। 

प्रदेश १ को नाम किराँत राख्‍न माग गर्दै मुख्यमन्त्री तथा मन्त्रिपरिषद्को कार्यालय घेराउ गर्दै मुख्यमन्त्री राईलाई ज्ञापनपत्र दिन पुगेको किराँत राई यायोख्खाको टोलीलाई सम्बोधन गर्दै मुख्यमन्त्री राईले सो  अभिव्यक्ति दिएका हुन्। उनले भने,‘प्रदेश सरकारले नाम तोक्ने भए म उहिल्यै राखिदिन्थे।’ नामाकरण प्रदेशसभाबाट हुने भन्दै उनले पहिचानको पक्षको स्पष्ट दुई तिहाई नपुग्‍ने भन्दै दबाब दिनुपर्ने उनले बताए। मुख्यमन्त्री राईले भने,‘व्यक्तिगत रुपमा सांसदहरुलाई फकाउनुहोस्, स्थिति फरक भए सडकमा उत्रिन जरुरी छ।’ आफ्नो कार्यकाल मंसिरसम्म मात्रै भएकाले मंसिरपछि आन्दोलन गर्न तपाईंहरुको साथमा आउने समेत उनले आश्वासन दिए। 

पुरानो इतिहास, पुराना कागज तमसुकमा किराँत भन्‍ने शब्द लेखिएकोले किराँत प्रदेश न्यायोचित रहेको उनले बताए। उनले भने,‘उहिल्यै वल्लो किराँत, पल्लो किराँत र माझ किराँत भन्ने थियो। सक्ने भए तीनवटै राज्य बनाउ। होइन भने सबैलाई मिलाउँदा किराँत हुन्छ। त्यही किराँत प्रदेश दिँदा केही बिग्रिन्छ त?’ पदमा बसेर पहिचानको पक्षमा बोल्न मिल्ने-नमिल्ने आफूलाई थाहा नभएको भन्दै उनले पहिचान जोडिएर नाम हुनुपर्ने नभए जुनसुकै मुल्य चुकाउन तयार रहेको बताए। उनले भने, ‘म किराँतीको छोरा भएर किराँत हुनुपर्छ भनेको होइन।’ 

पहिचान सहितको नाम नभए पछिसम्म तुस रहने र देशमा नै विखण्डन आउन सक्ने उनको भनाई छ। पछिसम्म विद्रोहको भावना किन राख्‍ने भन्दै मुख्यमन्त्री राईले भने,‘पहिचान सहितको नामकरण गर्दा के बिग्रन्छ र? विद्रोहको भावना किन पछिसम्म राख्‍ने?’