श्रीमतीसँग झगडा हुँदा आगो लगाएर हत्या

विराटनगर- मोरङको रंगेली १ बिर्ता बजारका तिलका मल्लिकले श्रीमतीलाई आगो लगाएर हत्या गरेका छन्। २३ वर्षीया मल्लीकले ३० वर्षीया बबिता मल्लिकको आगो लगाएर हत्या गरेका हुन्। 

खाना खाने बेलामा पत्‍नीसँग विवाद भएको र त्यसपछि शरीरमा मट्टितेल छर्किएर आगो लगाएको प्रारम्भिक अनुसन्धानबाट खुलेको प्रहरीले जनाएको छ। तिलका र बबिता सरसफाईको काम गर्थे। तिलकाले काम गर्दा भएको कमाई घरमा नदिने र अत्यधिक मदिरा सेवन गर्ने गरेको विषयलाई लिएर पति-पत्‍नीबीच बारम्बार झगडा भइरहने स्थानीयबासीले बताएका छन्। 

श्रीमतीको शरीरमा मट्टितेल छर्किएर आगो लगाएको खुलेका मोरङ प्रहरीका प्रवक्ता डीएसपी दीपक श्रेष्ठले बताए। आगोले जलेर गम्भीर घाइते भएको अवस्थामा शुक्रबारराति १० बजेतिर उपचारका लागि विराटनगरको कोसी अस्पतालमा ल्याइएको थियो। बबिताको उपचारका क्रममा शनिबार बिहान ६ बजेतिर मृत्यु भएको डीएसपी श्रेष्ठले बताए। 

श्रीमतीलाई आगो लगाएपछि तिलकाले घरमा आगलागी भएको भनेर प्रहरीलाई खबर गरेपछि उनी फरार बनेका थिए। घटनास्थल पुगेको प्रहरीले स्थानीयको सहयोगमा १ घण्टापछि नियन्त्रणमा लिएको थियो। आगलागीबाट २ लाख मूल्य बराबरको क्षति भएको प्रहरीले जनाएको छ। पत्नीलाई लगाएको आगोले घर पनि जलेर नष्ट भएको छ। 

तिलकालाई इलाका प्रहरी कार्यालय रंगेलीले राती नै पक्राउ गरेको थियो। उनीमाथि अनुसन्धान भईरहेको इलाका प्रहरी कार्यालयका प्रहरी निरीक्षक शैलेश न्यौपानेले बताए।