हैजाको उपचारका लागि पाटन अस्पताललाई ‘डेडिकेटेड’ अस्पताल तोकियो

काठमाडौं- जिल्ला प्रशासन कार्यालय ललितपुरले पाटन अस्पताललाई हैजा रोगको उपचारका लागि ‘डेडिकेटेड’ अस्पताल तोकेको छ। 

ललितपुरका प्रमुख जिल्ला अधिकारी घनश्याम उपाध्यायको संयोजकत्वमा बसेको सुरक्षा अधिकारी, स्थानीय तह, जनस्वास्थ्य अधिकृत, काठमाडौं उपत्यका खानेपानी लिमिटेड, खानेपानी वितरक, ट्यांकर व्यवसायी, उपभोक्ता अधिकारवादी, व्यवसायीसहितको बैठकले हैजा रोग तथा हैजासँग मिल्दोजुल्दो लक्षण भएका बिरामीको उपचारका लागि पाटन अस्पताललाई डेडिकेटेड अस्पताल तोक्ने निर्णय गरेको हो। 

डेडिकेटेड अस्पताल तोकिएसँगै हैजाका लागि पाटन अस्पतालमा छुट्टै हेल्थ डेस्क खडा गरी उपचारको प्रबन्ध मिलाइने प्रशासनले जनाएको छ। 

बैठकमा पानीका मुहान सफा गर्न स्थानीय तहलाई प्रभावकारी रूपमा काम गर्न अनुरोध गरेको छ। त्यस्तै मुहानमै उपकरणले परीक्षण गरेर मात्रै ट्यांकरमा हाल्न ट्यांकर व्यवसायीलाई निर्देशन दिइएको छ।