काठमाडौं- अखिल नेपाल फुटबल संघ (एन्फा)को महासचिवमा किरण राई नियुक्त भएका छन्। बुधबार बसेको नवनिर्वाचित कार्यसमितिको पहिलो बैठकले महासचिवमा राईलाई नियुक्त गर्ने निर्णय गरेको हो।
बैठकले कोषाध्यक्षको जिम्मेवारी रवीन्द्र जोशीलाई प्रदान गर्नेसमेत निर्णय गरेको छ। एन्फामा निर्वाचित कार्यसमितिले महासचिव र कोषाध्यक्ष नियुक्त गर्ने व्यवस्था छ।
यसअघि आजै नवनिर्वाचित कार्यसमितिका सदस्य र पदाधिकारीको सपथ ग्रहण भएको थियो। ३ बजे भएको शपथग्रहण लगत्तै नवनिर्वाचित कार्यसमितिको पहिलो बैठक बसेको थियो।
काठमाडौंको बुढानीलकण्ठस्थित पार्क भिलेज रिसोर्टमा सोमबार भएको निर्वाचनबाट पंकजविक्रम नेम्बाङ अध्यक्षमा निर्वाचित भएका थिए। वरिष्ठ उपाध्यक्षमा बीरबहादुर खड्का निर्वाचित भए। यस्तै उपाध्यक्षमा दावा लामा, दिपक खतिवडा, बिराट जंग शाही र दुर्गा बहादुर केसी निर्वाचित भएका थिए।
महिला सदस्यमा सरिला श्रेष्ठ र पेमा डोल्मा लामा निर्वाचित हुँदा सदस्यमा मनिष जोशी, अनिल मल्ल, रबिन्द्र चन्द, विकास नारायण श्रेष्ठ,भोजराज शाही, महेन्द्र क्षेत्री, पुरुषोतम थापा,रमेश ब्यन्जनकार, मनिराज विष्ट,टिकाराम लामा,भरत बुढा थापा निर्वाचित भए।
दीपक थापा क्षेत्री, रुपेश अधिकारी, दीपेन्द्र धिमाल र लोकेन्द्र गुरुङले ३९ मत प्राप्त गरेपछि एन्फाको विधान र फिफा र एएफसी प्रतिनिधिहरूको सुझावअनुसार दुई सदस्य तय गरिने एन्फाले जनाएको छ।