काठमाडौं- अखिल नेपाल फुटबल संघ (एन्फा)को अध्यक्ष पदमा पंकज विक्रम नेम्वाङ विजयी भएका छन्।
सोमबार बूढानीलकण्ठमा भएको मतदानमा उनी ४५ मत प्राप्त गरी अध्यक्षमा निर्वाचित भएका हुन्। उनका प्रतिस्पर्धी कर्मा छिरिङ शेर्पाले ३९ मत प्राप्त गरेका छन्।
यसअघि कर्मा एन्फाका अध्यक्ष थिए। पंकज वरिष्ठ उपाध्यक्ष थिए। चुनावी प्रतिस्पर्धामा यसपालि पंकजले कर्मालाई पछि पारेका हुन्। अध्यक्षकै अर्का प्रत्यासी राजीव पौडेलले भने एक मत पनि पाएनन्।
बुढानीलकण्ठमा अखिल नेपाल फुटबल संघ (एन्फा)को चुनावी साधारणसभा भएको थियो। पहिलो पूर्ण चिर्वाचनबाट अध्यक्ष बनेका कर्मा छिरिङ शेर्पाले आफ्नै कार्यकालका वरिष्ठ उपाध्यक्ष पंकजविक्रम नेम्बाङविरुद्ध चुनाव लडेर पराजय भोगेका हुन्।
दुवैले आआफ्नो पूर्ण टिमका चुनावमा गएका थिए। ससुशासनका लागि नेतृत्व परिवर्तन गर्नुपर्ने भन्दै पंकज समूह टिम बनाएर चुनावमा गएको थियो। कर्माले भने कोभिडका कारण धेरै काम अधुरै रहेकाले काम पूरा गर्न अझै एक कार्यकाल आफू नै अध्यक्ष बन्न चुनावमा होमिएको बताएका थिए।
एन्फा चुनावमा ८७ मत हुन्छ, जसअनुसार ४५ जिल्ला पर्छन्। तर सिन्धुली र भक्तपुरले यो निर्वाचनमा भोट हाल्न पाएनन्। निर्वाचनमा १४ ए डिभिजन क्लब, ११ बी डिभिजन क्लब, ९ सी डिभिजन क्लब र राष्ट्रिय लिगमा छनोट भएका चार क्लबले पनि मताधिकार पाएका छन्। त्यस्तै महिला संघ, खेलाडी संघ, प्रशिक्षक संघ र रेफ्री संघका एक–एक प्रतिनिधिले चुनावमा मताधिकार प्रयोग गर्न पाउने व्यवस्था छ।
कर्मा र पंकजको प्यानलमा कोको छन्?
कर्मा प्यानलबाट वरिष्ठ उपाध्यक्ष शिक्षित पराजुली, उपाध्यक्षहरुमा कुमार बहादुर केसी, रत्न कुमार श्रेष्ठ, उपेन्द्र मान सिंह, विज्ञान राज शर्मा छन्।
त्यस्तै, सदस्यहरूमा दीपक थापा, प्रविन यादव, रुपेश अधिकारी, लोकेन्द्र गुरुङ, राम राजा गुरुङ, टिकाराम लामा, प्रदेश सिंह राथोड, भरत गुण थापा, अनिल श्रेष्ठ, रमेश ब्यन्जनकार, मनि राज मिश्र र मनिश जिसी छन्।
नेम्वाङको प्यानलबाट वरिष्ठ उपाध्यक्षमा वीरबहादुर खड्का उम्मेदवार छन्। चार जना उपाध्यक्षमा काठमाडौं जिल्ला फुटबल संघका अध्यक्ष विराटजंग शाही, दावा लामा, सुन्दरनरसिंह जोशी र दीपक खतिवडाले उम्मेदवारी दर्ता गराएका छन्।
सदस्यमा प्रविण सुवाल, महेन्द्र क्षेत्री, पुरुषोत्तम थापा, विजय घले, नेपाल कार्की, तपेश्वर राउत, विकास नारायण श्रेष्ठ, भोजराज शाही, रविन्द्र चन्द र अनिल मल्ल उम्मेदवार छन्।