प्रदेश १ को प्रतिव्यक्ति आय ११८ अमेरिकी डलरले बढ्ने अनुमान

विराटनगर- प्रदेश १ को प्रतिव्यक्ति आय बढ्ने भएको छ। चालु आर्थिक वर्षमा प्रतिव्यक्ति आय १ हजार २६७ अमेरिकी डलर हुने अनुमान गरिएको छ।

गतवर्ष १ हजार १४९ अमेरिकी डलर रहेकोमा चालु आर्थिक वर्षमा ११८ अमेरिकी डलरले प्रतिव्यक्ति आय बढ्ने प्रदेश १ आर्थिक मामिला तथा योजना मन्त्रायले अनुमान गरेको छ। २०७५/७६ मा १ हजार ८९ र ०७६/७७ मा १ हजार ७३ प्रतिव्यक्ति अमेरिकी डलर थियो। 

आर्थिक सर्वेक्षण २०७८/७९ अनुसार प्रदेशगत रुपमा बागमतिको सवैभन्दा बढी २ हजार ४३० र सवैभन्दा कम मधेश प्रदेशको ८६८ अमेरिकी डलर रहेको अनुमान छ। 

प्रदेश १ को आर्थिक बृद्धिदर ५ दशमलव ४१ हुने अनुमान गरिएको छ। आर्थिक सर्वेक्षण २०७८/७९ मा आर्थिक बृद्धिदर ५ दशमलव ४१ पुग्ने अनुमान गरिएको हो।

चालु आर्थिक वर्षमा कोभिड १९ महामारीको प्रभाव क्रमश: घट्दै गई प्राय: सबै आर्थिक गतिविधिहरु पूर्ववत अवस्थामा सञ्चालन भएकाले गत आर्थिक वर्षको तुलमा बृद्धि हुने अनुमान गरिएको आर्थिक सर्वेक्षणमा उल्लेख छ। 

प्रदेशगत रुपमा हेर्दा सवैभन्दा बढी बागमतीको ६ दशलमल ७४ र सवैभन्दा कम मधेश प्रदेशको ४ दशमलव ८२ प्रतिशत रहने अनुमान गरिएको छ। 

०७७/७८ मा प्रदेश १ को आर्थिक बृद्धिदर ४ दशमलव ३४ रहेको थियो। चालु आर्थिक वर्ष सहित पछिल्लो ४ वर्षमा बार्षिक औषत बृद्धिदर ४ दशमलव २ प्रतिशत रहेको छ। 

आर्थिक सर्भेक्षण अनुसार गत आर्थिक वर्षको तुलनामा खर्चमा संकुचन आएको छ। २०७८/७९ को पहिलो ८ महिनामा अघिल्लो आर्थिक वर्षको तुलनामा ५ दशमलव ९ प्रतिशतले संकुचन आएको छ। ८ महिनामा १२ अर्व ५८ करोड २७ लाख रहेको छ। अघिल्लो आर्थिक वर्षको सोही अवधिमा १३ अर्ब ३६ करोड ४६ लाख थियो। 

०७७/७८ मा प्रदेश १ को कुल खर्च ०७६/७७ को तुलनामा ६ दशमलव ३ प्रतिशतले संकुचन भएको थियो। ०७७/७८ मा  २७ अर्व ९५ करोड १३ लाख थियो। आ.व. ०७६/७७ मा कुल खर्च ०७५/७६ को तुलनामा ४० दशमलव ७ प्रतिशतले बढेको आर्थिक सर्वेक्षणमा उल्लेख छ।