काठमाडौं- काठमाडौं महानगरपालिकाले बिहीबारबाट नौ वटा ब्रुमर सञ्चालनमा ल्याउने भएको छ। मेयर बालेन शाहले ब्रुमर बिग्रेकाले सबै चलाउन नसकिए पनि असाढ २ गतेबाट नौ वटा ब्रुमर सञ्चालनमा ल्याइने जनाएका छन्।
आजदेखि ५ वटा ब्रुमरले महानगर क्षेत्रको सफाइ गरिरहेकोमा भोलीबाट थप चार ब्रुमर सञ्चालनमा आउने उनले बताए।
'आजबाट पाँच ब्रुमरले काम गरिरहेको भए पनि बाँकी चार ब्रुमर भोलिदेखि सञ्चालनमा हुन्छन्। त्यसपछि नौ वटा ब्रुमरले नियमित रुपमा महानगरको सफाइ गर्नेछन्,' उनले भने।
शाहले वर्षायाम भएकाले केही ठाउँमा असहज हुने प्रस्ट पारेका छन्। आवश्यक ठाउँमा चाँडो पुगेर काठमाडौंलाई धुलोरहित बनाउने उनले विश्वास व्यक्त गरे।