कुटपिट आरोपमा लुम्बिनीकी प्रदेश राज्यमन्त्री विमला वली प्रहरी नियन्त्रणमा

काठमाडौं- लुम्बिनी प्रदेशकी स्वास्थ्य राज्यमन्त्री विमला कुमारी खत्री (वली)लाई प्रहरीले नियन्त्रणमा लिएको छ। वाइसिएलका नेता एकराज बस्नेतकी श्रीमती र छोरीलाई कुटपिट गरेको भन्दै प्रहरीले राज्य मन्त्री वलीलाई नियन्त्रणमा लिएको हो। 

तुलसीपुर उपमहानगरपालिका-५ बसपार्कस्थित एकराज बस्नेतको घरमा पुगेर उनले श्रीमती र छोरीलाई हातपात गरेको स्थानीयले जनाएका छन्। 

इलाका प्रहरी कार्यालय तुलसीपुरले उक्त विषयमा अनुसन्धान गर्नका लागि वलीलाई नियन्त्रणमा लिइएको जनाएको छ। घटना हुँदा एकराज घरमा थिएनन् । मन्त्री नहुँदै एकराजसँग खिचेको बिमलाको सेल्फी भाइरल भएको थियो । 

वली लु १ झ ५३७ नम्बरको सरकारी गाडी चढेर त्यहाँ पुगेकी थिइन्। घटना हुँदा एकराज घरमा थिएनन्। उनका आफन्तहरुले प्रहरीलाई खबर गरेका थिए।

नेकपा एमालेबाट दाङ ३ ख बाट प्रदेशसभा सदस्य निर्वाचित भएका उत्तरकुमार वलीको दुर्घटनामा मृत्यु भएपछि तत्कालीन नेकपाबाट उनकी श्रीमती विमला वली सांसद निर्वाचित भएकी थिइन्। नेकपा विभाजनपछि उनी माओवादीमा लागेकी थिइन्।