काठमाडौं- अन्तर्राष्ट्रिय मैत्रीपूर्ण खेलमा ब्राजिलले सानदार जित निकालेको छ। कोरियाको सिओल विश्वकप रंगशालामा बिहीबार सम्पन्न खेलमा ब्राजिलले घरेलु टोलीमाथि ५–१ को जित निकालेको हो। ब्राजिलको जितका लागि नेयमारले दुई गोल गरे भने रिचार्लिसन, फिलिप काउटिन्हो र ग्याब्रियल जिससले समान १–१ गोल गरेका थिए।
यता कोरियाका यूजे हङले एक गोल फर्काएका थिए। खेलको सातौं मिनेटमै फ्रेडबाट पाएको बलमा रिचार्लिसनले ब्राजिललाई अग्रता दिलाएका थिए। त्यसपछि खेलको ३१ औं मिनेटमा हङल खेललाई १–१ को बराबरीमा पुर्याएका थिए।
तर, ब्राजिलले अग्रता बनाइहाल्यो। ४२ औं मिनेटमै पेनाल्टीको अवसर पाएपछि ब्राजिले पुनः अग्रता बनाएको हो। नेयमारको गोलसँगै ब्राजिल पहिलो हाफमा एक गोलले अघि रह्यो।
दास्रो हाफको ५७ औं मिनेटमा ब्राजिलले अर्को पेनाल्टीको अवसर पायो। यसपटक नेयमारले नै गोल गरे। अग्रतालाई बढाउने क्रममा काउटिन्होले खेलको ८० औं मिनेटमा र जिससले इन्ज्युरी समयमा गोल गरेका थिए। जिससको गोलसँगै ब्राजिलले ५–१ को जित निश्चित गरेको हो।