बढ्यो महिला र पुरुष क्रिकेट खेलाडीको तलब

काठमाडौं- नेपाली महिला तथा पुरुष क्रिकेट खेलाडीको तलबमा वृद्धि भएको छ। नेपाल क्रिकेट संघ (क्यान) को मंगलबार बसेको बैठकले महिला तथा पुरुष खेलाडीको तलब वृद्धि गरेको क्यानले जानकारी दिएको हो।

नेपाली सिनियर पुरुष टिमका खेलाडीको तलब १० हजारले बढ्ने भएको छ। यसअघि ए, बी र सी श्रेणिका खेलाडीको तलब क्रमशः ५० हजार, ४० हजार र ३० हजार थियो।

अब सेन्ट्रल कन्ट्राक्टमा रहने सबै खेलाडीको तलब १० हजारका दरले बढेसँगै 'ए' श्रेणीको खेलाडीले मासिक ६० हजार पाउनेछन्।

यता महिला खेलाडीको पनि तलबमा वृद्धि गरिएको क्यानले जानकारी दिएको छ। यसअघि ए, बी र सी श्रेणीका खेलाडीको तलब क्रमशः १५ हजार, १२ हजार र १० हजार तोकिएको थियो।

नेपालीमा महिला खेलाडीले यो वर्षबाट मात्र तलब पाउन थालेका हुन्। यससँगै उनीहरूको यो वर्षबाट सेन्ट्रल कन्ट्राक्ट पनि भएको छ। महिलातर्फ भने दुई तरिकाले तलब वृद्धि गरिएको छ। सी ग्रेडमा रहेका खेलाडीको तलब मासिक पाँच हजारले बढेको छ भने ए र बी ग्रेडमा रहेका खेलाडीको तलब भने ६ हजारका दरले बढेको छ।

त्यस्तै, टीयू मैदान पिचका कर्मचारी र क्युरेटरको पनि तलब बढाउने निर्णय क्यानले गरेको हो।

बढेको तलब गएको अप्रिल १ तारिखबाट लागू हुने क्यानले विज्ञप्तिमार्फत जानकारी दिएको छ।