काठमाडौं– नेपाल क्रिकेट संघ (क्यान) ले यू १९ महिला क्रिकेटको कप्तानमा कृतिका मरासिनीलाई नियुक्त गरेको छ। अहिले काठमाडौंमा जारी यू १९ को टिमको कप्तानमा कृतिका छनोट भएको क्यानले जानकारी दिएको हो।
यू–१९ महिला विश्वकप छनोटको तयारीका लागि अहिले नेपाली टिम बन्द प्रशिक्षणमा छन्। क्रिकेट संघले विश्वकपको छनोट खेल्नुअघि धनगढीमा यू–१९ महिला क्रिकेट प्रतियोगिता आयोजना गरेको थियो। सो प्रतियोगितापछि क्यानले गएको वैशाख ८ गते ४४ खेलाडीलाई सुरुआती बन्द प्रशिक्षणमा बोलाएको थियो।
वैशाख ११ बाट पोखरामा प्रशिक्षण सुरु भएको थियो। त्यसपछिको छनोटमा क्यानले १८ खेलाडीको नाम सार्वजनिक गरेको हो। अहिले ती खेलाडी कीर्तिपुरको त्रिवि मैदानमा प्रशिक्षण गरिरहेका छन्।
यू १९ टिममै रहेकी हिरन्मयी रायले भने नेपाली सिनियर टिमबाट पनि डेब्यू गरिसकेकी छन्। उनले सिनियर टिमबाट दुई खेल खेलेकी हुन्। यू–१९ महिला विश्वकप अर्को वर्ष दक्षिण अफ्रिकामा पहिलो पटक आयोजना हुँदैछ। आईसीसीको क्यालेन्डरमा अघिल्लो वर्ष नै आयोजना हुनुपर्ने प्रतियोगिता कोभिड १९ को महामारीका कारण पछि सरेको हो।
प्रतियोगितामा १६ देशको सहभागिता हुनेछ भने ४१ खेल हुनेछन्। यो छनोटअन्तर्गत नेपालको समूहमा मलेसिया, संयुक्त अरब इमिरेट्स, थाइल्याण्ड, चीन, भुटान, म्यानमार र कतार रहेका छन्। छनोट खेल जुन ४ तारिखबाट हुनेछ।
यी हुन् छनोट भएका खेलाडीः
किरण कुँवर, सोनु राजवंशी, टीका शाह, सृष्टि धामी, सावित्री धामी, अलिशा यादव, रञ्जु श्रेष्ठ, अञ्जली बिके, हिरणमयी राय, अलिशा खाडिया, कृतिका मरासिनी, मिनिषा उपाध्याय, स्नेहा महरा, निसा शाह, मिनिषा राना मगर, प्रतिमा शाह, ज्योतिस्का मरासिनी र मनिषा चौधरी