चिवतन- चिवतनको भरतपुर महानगरपालिकामा मतगणना जारी रहँदा नै निकटतम प्रतिस्पर्धीभन्दा फराकिलो अग्रता बनाएर मेयर पदमा सत्ता गठबन्धनतर्फ नेकपा (माओवादी केन्द्र)की उम्मेदवार रेनु दाहाल विजयको बाटो तय गर्ने देखिएको छ।
हालसम्म २३ वटा वडाको मतगणना हुँदा दाहालले एमालेका उम्मेदवार विजय सुवेदीभन्दा ९ हजार ८७२ मतको अग्रता बनाएपछि उनको जित सहज देखिएको हो। गणनाको कुनै बेला विजयलाई पछ्याएकी रेनुको मतान्तर अझ फराकिलो बनाउने क्रम जारी छ।
स्वतन्त्र (कांग्रेसका बागी) उम्मेदवार जगन्नाथ पौडेलेल १३ हजार ३३० मत ल्याएका छन्। उपमेयरमा भने सत्ता गठबन्धनबाट कांग्रेसका उम्मेदवार चित्रसेन अधिकारीले राप्रपाकी हिमला गुरुङलाई १८ हजार २१३ मतान्तरले पछाडि पारेका छन्। अधिकारीले ४४ हजार ८२८ मत पाएका छन्।
२९ वडामध्ये २३ वटा वडाको गणना भइसकेको छ। अहिले २३ र २५ नम्बर वडाको गणना भइहरेको छ। भरतपुरमा खसेको कुल मत १ लाख २७ हजार ८३९ मध्ये १ लाख ८ हजार ४५ मतगणना भइसकेको छ।
अब ७ वटा वडाको १९ हजार ७९४ मत गन्न बाँकी छ। त्योमध्ये पनि वडा नम्बर २३ र २५ को केही मतगणना भइसकेको छ। हालसम्मको अवस्था हेर्दा एमालेका विजयको कमब्याक हुने सम्भावना कम छ। मतगणनास्थलमा रहेका एमालेका प्रतिनिधि एमालेले जित्ने आशा मारिसकेका छन्।