सलमान खानसँग पूजा हेग्डे नेपाल आउँदै, ज्याकलिनलाई मिलेन अनुमति

काठमाडौं- जेठ १४ गते दशरथ रंगशालामा हुने कन्सर्टमा सलमान खानसँगै पूजा हेग्डे नेपाल आउने भएकी छिन। बलिउड नायिका ज्याकलिन फर्नान्डिज नआउने पक्का भएपछि पूजा नेपाल आउन लागेकी हुन्। विदेश यात्राको अनुमति माग्दै अदालतमा दायर निवेदनलाई ज्याकलिनले बुधबार फिर्ता लिएकी छन्।

सम्पत्ति शुद्धीकरणसम्बन्धी विचाराधीन मुद्दाको छानबिन निरन्तर हुने भएपछि ज्याकलिनका वकिलले विदेशयात्राको अनुमतिसम्बन्धी निवेदन फिर्ता लिएपछि ज्याकलिन नेपाल आउने विषय थातीमा बसेको हो। मुद्दाको छिनोफानो नभएसम्म उनी विदेशयात्रामा निस्कन पाउने छैनन्।

सुकेश चन्द्रशेखरसँगको करिब ७०० करोड भारुको गैरकानूनी मुद्रा ओसारपोसारको मुद्दामा ज्याकलिन मुछिएकी छिन्। उनलाई देश छोड्न प्रतिबन्ध लगाइएको छ। 

सलमानको 'द ब्याङ रिलोडेड टूर'मा ज्याकलिन सदस्यसमेत छिन्। नेपालको कार्यक्र र अबुधावीमा हुने आइफा अवार्ड (जुन अहिले स्थगित भैसकेको छ)सहित फ्रान्सको कार्यक्रममा जान ज्याकलिनले अनुमति माग्दै अदालतमा निवेदन दिएकी थिइन्।

ज्याकलिन नेपाल नआउनेपछि आयोजकले उनको ठाउँमा अर्की बलिउड अभिनेत्री पूजा हेग्डेलाई ल्याउने भएको हो।

सलमानको कन्सर्टका लागि आवश्यक उपकरण बोकेको ३२ वटा ट्रक आज भारतबाट नेपालको लागि हिँडेको समेत जनाइएको छ।