यस्तो हुनेछ आइतबारको मौसम

काठमाडौं- हाल देशमा पश्चिमी वायु र स्थानीय वायुको प्रभाव तथा अरब सागरबाट भित्रिरहेको जलवाष्पयुक्त हावाको आंशिक प्रभाव रहेको जल तथा मौसम विज्ञान विभागले जनाएको छ।

यसका कारण कोसी प्रदेश, गण्डकी प्रदेश, कर्णाली प्रदेश र सुदूरपश्चिम प्रदेशका पहाडी भेगमा आंशिकदेखि साधारणतया बदली (आकाशमा बादल) रही थोरै स्थानमा हल्का वर्षा भइरहेको विभागले जनाएको छ।

विभागले शनिबार साँझ ६ बजे जारी गरेको बुलेटिनअनुसार राति देशको पहाडी भूभागका एक-दुई स्थानमा मेघ गर्जन र चट्याङसहित हल्का वर्षा हुने सम्भावना छ। कोसी प्रदेश, गणडकी प्रदेश, लुम्बिनी प्रदेश र कर्णाली प्रदेशका हिमाली भूभागका एक-दुई स्थानमा हल्का वर्षा र हिमपात हुने सम्भावना छ।

यसैगरी आइतबार दिउँसो पनि पहाडी भूभागका थोरै स्थानमा हल्कादेखि मध्यम वर्षा हुने सम्भावना छ भने देशका बाँकी भूभागका पनि एक-दुई स्थानमा मेघ गर्जन र चट्याङसहित हल्का वर्षा हुने सम्भावना छ। देशका हिमाली भूभागका एक-दुई स्थानमा हल्का वर्षा र हिमपात हुने सम्भावना छ। मधेस प्रदेशलगायत लुम्बिनी प्रदेशका थोरै स्थानमा हुरीसमेत आउने सम्भावना रहेको मौसम महाशाखाले जनाएको छ। 

महाशाखाले आगामी २४ घण्टाका लागि चेतावनी तथा परामर्श पनि जारी गरेको छ। जसमा भनिएको छ: लुम्बिनी प्रदेश र सुदूरपश्चिम प्रदेशलगायत देशको पहाडी भूभागका थोरै स्थान तथा बाँकी भूभागका एक-दुई स्थानमा मेघगर्जन/चट्याङसहित हल्कादेखि मध्यम वर्षा हुने सम्भावना छ।

मधेस प्रदेशलगायत लुम्बिनी प्रदेशको तराईका थोरै स्थानमा हावाहुरीको समेत सम्भावना रहेकाले  दैनिक जनजीवन, कृषि, स्वास्थ्य, सडक तथा हवाई यातायातमा प्रभाव पर्न सक्ने हुँदा सोको असरबाट बच्न आवश्यक तयारी गर्न हुन तथा आवश्यक सतर्कता अपनाउन हुन अनुरोध छ।