जहाँ बुबाको हारको बदला लिए छोराले

विराटनगर– ०७४ को स्थानीय तह निर्वाचनमा मोरङको केराबारी गाउँपालिका अध्यक्षमा एमालेका उम्मेदवार नविन थापा मगर थिए। निर्वाचनमा उनी विजयी हुन सकेनन्। एमालेको आधार क्षेत्रबाट उनी पराजित भए। थापा मगरलाई नेपाली कांग्रेसका रोहितबहादुर कार्कीले पराजित गरे। 

कार्कीले ५ हजार ४९९ मत ल्याउँदा थापा मगरले ५ हजार २१७ मतमात्रै ल्याउन सके। २८२ मतान्तरले थापा मगर पराजित भए। एमालेले उपाध्यक्ष आफ्नो पक्षमा पार्न सक्यो। यस पटकको स्थानीय तह निर्वाचनमा केराबारीमा एमालेले अध्यक्ष, उपाध्यक्ष सहित बहुमत वडाध्यक्षहरु आफ्नो पक्षमा पार्न सकेको छ। 

निर्वाचनमा एमालेबाट नविन थापामगर उम्मेदवारको दौडमा थिएनन्। उनले आफूलाई प्रतिष्पर्धामा नल्याएर छोरा सुमन मगरलाई प्रतिष्पर्धामा उतारे। नेपाली कांग्रेसबाट निवर्तमान गाउँपालिका अध्यक्ष कार्की नै प्रतिष्पर्धामा थिए। कार्कीलाई मगरले १ हजार ४२० मतान्तरले हराउँदै अघिल्लो निर्वाचनमा बुवालाई हराएको बदला लिएका छन्। मगरले बुवालाई पराजित गर्नेलाई हराउँदै एमालेको सो क्षेत्रको पुरानो विरासतलाई पनि फर्काएका छन्। 

 नेपाली कांग्रेसबाट निवर्तमान गाउँपालिका अध्यक्ष कार्की नै प्रतिष्पर्धामा थिए। कार्कीलाई मगरले १ हजार ४२० मतान्तरले हराउँदै अघिल्लो निर्वाचनमा बुवालाई हराएको बदला लिएका छन्।

बुधबार बिहान निर्वाचन अधिकृतको कार्यालयले घोषणा गरेको अन्तिम मतपरिणाम अनुसार मगरले ७ हजार ८१० मत प्राप्त गरेका छन्। उनका निकटतम प्रतिद्वन्द्वी कार्कीले ६ हजार ३९० मत ल्याएर पराजित भएका छन्। अध्यक्षमा पराजित कार्कीले हारलाई स्वभाविक रुपमा लिएको प्रतिक्रिया दिएका  छन्।

एमाले नेता तथा केराबारी गाउँपालिका २ (साविक सिंहदेवी गाविस) पूर्व अध्यक्ष डिल्लीराम शर्मा अधिकारीले विजयलाई अवसरको रुपमा लिनुपर्ने बताएका छन्। जितलाई जनताका पक्षमा अत्यन्तै सालिनतापूर्वक प्रयोग गरी काम गर्नुपर्ने बताए।

राष्ट्रिय युवा संघ नेपालका केन्द्रीय सदस्य तथा एमाले मोरङका सदस्य समेत रहेका नवनिर्वाचित अध्यक्ष मगरले चुनावी प्रतिबद्धता अनुसार गाउँपालिकालाई गतिदिने बताए। १० वटा वडा रहेको केराबारीमा एमालेबाट उपाध्यक्षमा मनमाया मगर, वडा नम्वर १ मा शरण थापा मगर, २ मा प्रेमबहादुर लिम्वु, ३ मा रामचन्द्र शाही, ५ मा अजय लिम्वु, ७ मा खगेन्द्रप्रसाद निरौला र १० पूर्ण मगर निर्वाचित भएका छन्।