चितवनका सीडीओले माफी मागेपछि भरतपुरको मतगणना पुनः सुरु

चितवन- भरतपुर महानगरपालिकाको मतगणना पुनः सुरु भएको छ। चितवनका प्रमुख जिल्ला अधिकारी (सीडीओ) अस्मान तामाङले माफी मागेपछि गणना सुरु भएको हो। कुन मत बदर हुने र कुन नहुने भन्नेबारे विवाद भएपछि अवरुद्ध बनेको मतगणना करिब २ घण्टापछि पुनः सुरु भएको हो।

गणनामा विवाद भएपछि सीडीओले कर्मचारीलाई निकाल्न खोजेका थिए। यसै विषयमा विवाद चर्किँदै गयो। विवाद साम्य भएर अहिले गणना सुरु भएको मुख्य निर्वाचन अधिकृतले जानकारी दिए। उनका अनुसार विवादित कर्मचारीलाई भोलिदेखि मतगणनामा सहभागी नगराउनेसमेत सहमति भएको छ। 

दुईवटा मतपत्रमा डबल छाप देखिएपछि विवाद उत्पन्‍न हुँदा मतगणना रोकिएको थियो। भरतपुर गणना विभिन्न काउन्टरमा भइरहेको छ। एक नम्बर काउन्टरका मतपत्रमा रुख र हँसिया हथौडामा दुवैमा स्वस्तिक छाप देखियो। ७ नम्बर काउन्टरमा पनि हलो र सूर्य दुवैमा छाप देखियो। ७ नम्बर र ३ नम्बर काउन्टरको मत बदर गरियो। तर एक नम्बर काउन्टरको मतलाई बदर गर्न नमान्दा विवाद उत्पन्‍न भएको थियो। मत सदर र बदरको विषयमा विवाद भएपछि सीडीओले कर्मचारीलाई बाहिर निस्कन भनेका थिए। यसै विषयमा कर्मचारी र दलका प्रतिनिधि विभाजित भएका थिए। 

यसपछि उम्मेदवारको चिह्नमा लगाइएको स्वस्तिक छापमा कर्मचारीले गडबड गर्न खोजेको आरोप लगाउँदै एमालेका प्रतिनिधिले होहल्ला गरेका थिए। सीडीओले माफी मागेपछि गणना सुरु भएको हो।