कांग्रेस कार्यकर्तामाथि खुकुरी प्रहार आरोपमा माओवादी कार्यकर्ता पक्राउ

रोल्पा- रोल्पामा नेपाली कांग्रेसका कार्यकर्तामाथि खुकुरी प्रहार गरेको आरोपमा प्रहरीले नेकपा माओवादी केन्द्रका एक कार्यकर्तालाई पक्राउ गरेको छ।

पक्राउ पर्नेमा गंगादेब गाउँपालिका वडा नम्बर ५ सिमखोलाका २४ वर्षीय प्रकाश केसी रहेको प्रहरीले जनाएको छ। बाटो ढुकेर कांग्रेस कार्यकर्ताहरूमाथि खुकुरी प्रहार गरेको आरोपमा उनलाई नियन्त्रणमा लिइएको प्रहरीले जनाएको छ।

उनलाई सल्यानको बागचौरबाट नियन्त्रणमा लिइएको प्रहरीको भनाइ छ। घटनालगत्तै उनी फरार थिए। उनी रोशन ग्यारेजमा लुकेर बसेको अवस्थामा पक्राउ परेका हुन्।

वैशाख २६ गते बेलुकी गंगादेब गाउँपालिका वडा नम्बर ५ कुइन्यौंटा डाँडोमा चुनाव प्रचारप्रसार गरी फर्कंदै गरेका तरूण दलका कार्यकर्तामाथि माओवादी कार्यकर्ताले आक्रमण गरेका थिए।

आक्रमणबाट तरण दलका कार्यकर्ता ३० वर्षका मानबहादुर बुढा र २० वर्षीय कमल बुढा गम्भीर घाइते भएका थिए।