कार्यकर्ताको हत्यापछि चितवन कांग्रेस आक्रोशित, दोषीलाई कारबाहीको माग

चितवन- चितवनको भरतपुरमा नेपाली कांग्रेसका कार्यकर्ताको धारिलो हतियार प्रहार गरी हत्या भएको छ। भरतपुर-१२ निवासी अनिल परियार (कान)को साँझ ७:३० बजे  धारिलो हतियार प्रयोग गरी हत्या भएको हो।

उनी नेपाली कांग्रेसका बागमती प्रदेश प्रतिनिधिसमेत हुन्। आफ्ना कार्यकर्ताको हत्यापछि नेपाली कांग्रेस चितवन आक्रोशित भएको छ।

नेपाली कांग्रेस चितवनका सभापति राजेश्वर खनालले दोषीलाई तत्काल कारबाहीको माग गरेका छन्। 'उनको भरतपुर-७ कृष्णपुर खेलमैदान अगाडि भिडभाड हुने समयमै हत्या गरिएको छ। यसले हाम्रा कार्यकर्ता निकै असुरक्षित रहेको महसुस भएको छ,' नेपाल समयसँग कुरा गर्दै उनले भने, 'दोषीलाई चाँडोभन्दा चाँडो कारबाही गरियोस्।'

खनालले गृह मन्त्रालयलाई पत्राचार गरेर दोषीलाई कारबाही गर्नुका साथै उच्चस्तरीय छानबिन समिति गठन गर्न माग गरिएको बताएका छन्। उनले स्थानीय प्रहरी प्रशासनलाई पनि तत्काल दोषी पत्ता लगाइ कानुनी दायरामा ल्याउन माग गरिएको बताएका छन्।

'हामी गठबन्धनमा आबद्ध नेताहरूले केही बेरमा संयुक्त विज्ञप्ति जारी गर्दै छौं। पछिल्लो एक महिनामै चितवनमा एउटै प्रकृतिका तीन हत्याका घटना भएका छन्। यसले यहाँको कमजोर सुरक्षाव्यवस्था प्रस्ट भएको छ। चितवनमा सुरक्षा व्यवस्था बलियो बनाउन हाम्रो माग छ,' उनले भने।

अज्ञात समूहले आक्रमण गरेको थियो। उनको चितवन मेडिकल कलेजमा उपचारका क्रममा मृत्यु भएको जिल्ला प्रहरी कार्यालय चितवनका प्रवक्ता डीएसपी नरहरी अधिकारीले जानकारी दिए।

यसका साथै ती युवाको हत्या भएपछि भरतपुरका दुई स्थानमा टायर बालिएको छ। मिलनचोक र आस्था चोकमा टायर बालिएको हो। तर, कसले टायर बालेको भन्ने थाहा नभएको प्रहरीले जनाएको छ।

जिल्ला प्रहरी कार्यालय चितवनका प्रवक्ता डीएसपी अधिकारीले हत्याराको खोजी भइरहेको बताए। उनले कुनै पनि हालतमा दोषी उम्किन नपाउने बताएका छन्।