चितवनमा स्थानीय तह निर्वाचन विशेष सुरक्षाको जिम्मा सेनालाई

काठमाडौं- चितवनको महत्त्वपूर्ण क्षेत्रको सुरक्षाको जिम्मा नेपाली सेनाले लिएको छ। स्थानीय तहको निर्वाचनलाई लक्षित गरी जिल्लाको महत्त्वपूर्ण मानिएको क्षेत्र कारागार कार्यालय चितवन र भरतपुर विमानस्थलको सुरक्षाको जिम्मा नेपाली सेनाले लिएको हो।

प्रमुख जिल्ला अधिकारी अस्मान तामाङका अनुसार निर्वाचनलाई लक्ष्य गरी जिल्ला सुरक्षा समितिको वैशाख १५ गतेको निर्णयअनुसार महत्त्वपूर्ण निकायमा सेनाले सुरक्षाको जिम्मेवारी लिएको हो। यी क्षेत्रमा जेठ २ गतेसम्म नेपाली सेनाले सुरक्षाको जिम्मेवारी लिने छ। निर्वाचन नसकिएको खण्डमा समय थप गर्न सकिने उनले बताए।

निर्वाचनको समयमा प्रहरीमा पर्याप्त जनशक्ति नहुने हुँदा सुरक्षाको जिम्मेवारी सेनालाई दिइएको उनले बताए। उनले भने, 'यी दुई क्षेत्रमा आन्तरिक काम नेपाल प्रहरीले गर्ने छ। सुरक्षा सेनाले दिनेछ।' हरेक निर्वाचनमा महत्त्वपूर्ण प्रतिष्ठान र निकायमा सुरक्षाको जिम्मेवारी नेपाली सेनाले लिने गरेको छ।

यही वैशाख ३० गते हुने स्थानीय निकायको निर्वाचनलाई लक्षित गरी जिल्लामा सुरक्षा व्यवस्थासमेत मजबुत बनाइएको छ। निर्वाचन सुरक्षा योजनाअनुसार अहिले मतदान स्थलको सुरक्षाको अवस्थाका बारेमा जानकारी लिने काम भइरहेको जिल्ला प्रहरी कार्यालय चितवनका प्रवक्ता प्रहरी नायब उपरीक्षक नरहरि अधिकारीले जानकारी दिए।

उनका अनुसार अहिले मतदान स्थलको निरीक्षण, अनुगमनका काम भइरहेको छ। मतदान स्थलमा हुनसक्ने सम्भावित घटनाको समेत पूर्वानुमानका कामसमेत भइरहेको उनको भनाइ छ।