आइपिएलमा बैंगलोरले चेन्नइलाई हरायो

काठमाडौं- इन्डियन प्रिमियर लिग (आईपीएल) मा रोयल च्यालेन्जर्स बैंगलोरले चेन्नई सुपर किंग्सलाई १३ रनले हराएको छ। पुनेमा सम्पन्न भएको खेलमा पहिले ब्याटिङ गरेको बैंगलोरले पुरा ओभर खेल्दै ८ विकेट गुमाएर १७३ रन बनाएको थियो।

जवाफमा चेन्नईले २० ओभरमा आठ विकेट नै गुमाएर १६० रन मात्र बनाएपछि बैंगलोरले जित निकालेको हो।

बैंगलोरका लागि विराट कोहलिले ३०, फफ डु प्लेसिसले ३८ रन बनाए भने महिपाल लोमरोरे ४२ रन बनाएका थिए। त्यसक्रममा चेन्नईका महिश ठीकसानाले तीन विकेट लिए भने मोइन अलीले एक विकेट गिराए।

त्यस्तै, जवाफमा चेन्नईका डेवोन कोन्वेले ५६ रन बनाए भने मोइनले ३४ रन बनाए। चेन्नईलाइ लक्ष्य पुरा गर्न नदिन हर्षल पटेलले तीन, ग्लेन म्याक्सवेलले दुई विकेट लिए भने शबाज अहमद, जोस हज्लेवुड र वानिन्दू हसरंगाले समान १-१ विकेट गिराए।

यो जितसँगै १२ अंक बनाएको बैंगलोर तालिकाको चौथो स्थानमा उक्लिएको छ भने चेन्नई तालिकाको नवौं स्थानमा समेटिएको छ।