वीरगन्ज हेल्थकेयरमा आगो लाग्दा करोडौंको क्षति

वीरगन्ज- वीरगन्ज महानगरपालिका-१४ गण्डक बहुअरीस्थित वीरगन्ज हेल्थकेयर हस्पिटलमा विद्युत सर्ट भएर आगलागी भएको छ। आगलागीबाट करोडौंको क्षति भएको प्रहरीले जनाएको छ। 

अस्पतालको तेस्रो तल्लामा रहेको डायलोसिस शाखामा शुक्रबार राति ९ बजेतिर विद्युत सर्ट भएर आगलागी भएको हो। 

आगलागीबाट डायलोसिस शाखामा रहेका डायलोसिस मेसीन ६ वटा, भेन्टिलेटर २ वटा, कार्डियेक मोनिटर ६ वटा र बेड ६ वटा जलेर नष्ट भएका छन्। अस्पतालका सन्चालक डाक्टर अबुल हैयश अन्सारीले आगलागीका बेला डायलोसिस शाखामा बिरामी र स्वास्थ्यकर्मी नभएकाले मानवीय क्षति भने हुन नपाएको बताए। 

शुक्रबार राति ९ बजेतिर हावाहुरीसँगै पानी परिरहेका बेला चट्याङ पनि खसिरहेकाले चट्याङकै कारण डायलोसिस शाखामा विद्युत सर्ट भएर आगलागी भएको अन्सारीले बताए।

वीरगन्ज महानगरपालिकाको वारुणयन्त्रको मदतमा अग्नि नियन्त्रक र प्रहरीले आगो नियन्त्रणमा लिएको प्रहरीले जनाएको छ।